Украинада коронавирус тарқалиши муносабати билан мамлакат ичидаги авиа, йўловчи поездлари, автобуслар қатнови тўхтатилади, деб хабар берди «РБК».
18 мартдан кучга кирадиган чеклов шаҳарларо ва вилоятлараро ташувларга дахлдор. Бундан ташқари, 17 мартдан Украина шаҳарларидаги метрополитен ҳам ишини тўхтатади.
Шаҳар транспортининг бошқа турлари ўз фаолиятини давом эттиради, лекин чекловлар билан. Шундай қилиб, таксилар, троллейбуслар, автобуслар ва трамвайларда ташиш салондаги одамлар сони 10 нафардан ошмасагина амалга оширилиши мумкин.
Бу чоралар украиналикларнинг шахсий автомобилида ҳаракатланишига нисбатан қўлланилмайди.
Бундан ташқари, 17 мартдан Украинада 10 дан ортиқ одам иштирок этадиган барча оммавий тадбирларни ўтказиш тақиқланади. Фақат давлат органлари ва маҳаллий ўзини ўзи бошқариш органлари фаолиятини таъминлаш учун зарур бўлган чора-тадбирларга рухсат берилади.
Бундан ташқари, мамлакатда ресторанлар, кафелар, савдо-кўнгилочар марказлар ва маданият муассасалари вақтинча тўхтатилди. Ходимлар шахсий ҳимоя воситалари билан таъминланган бўлса, умумий овқатланиш муассасалари етказиб бериш хизматларини тақдим этиши мумкин.
Аввалроқ Украинанинг Житомир вилоятида 12 март куни коронавирус инфекцияси билан касалхонага ётқизилган 71 ёшли аёл вафот этгани ҳақида хабар берилган эди. Шундан сўнг Киевда 12 мартдан бошлаб оммавий тадбирлар тақиқланди, мактаблар ёпилиши маълум бўлди.
Мавзуга доир:
- Россияда коронавируснинг тўртинчи тести ишлаб чиқилаётгани маълум қилинди
- «Дунёнинг энг бой кишилари бу касалликдан қутула олмадими, унда биз ҳам тайёр туришимиз керак». Канададаги ўзбекистонлик коронавирус ҳақида
- Тошкентдаги автобусларда дезинфекция ишлари амалга оширилмоқда
- Видео: Соғлиқни сақлаш вазири Алишер Шодмонов карантинга олинган ўзбекистонликларнинг умумий сонини маълум қилди
Изоҳ (0)