Италиядаги касалхонада реанимация учун клапанлар тугаб қолди. Шунда маҳаллий компания уларни 3D-принтерда чоп қилиб берди

Италиянинг Брешиа шаҳрида шифокорлар 3D-принтерда чоп қилинган клапанлардан фойдаланиб, беморлар ҳаётини сақлаб қолди. Бу ҳақда Миландаги FabLab устахонаси директори Массимо Темпореллининг сўзларига асосланиб, TJournal хабар берди.

Брешиадаги коронавирусни юқтирган 250 нафар бемор бўлган шифохонада реанимация аппаратлари учун ишлатиладиган клапанлар тугаб қолди. Шифокорлар ускуна етказиб берувчиларга мурожаат қилди, бироқ улар ускунани тез орада етказиб бера олмаслигини айтди.

Шунда шифокорлар маҳаллий Giornale di Brescia нашри билан боғланиб, ёрадм сўради. Газета эса технологик лойиҳаларда ҳамкорлик қилган Темпорели билан маслаҳатлашди. Темпорели маҳаллий компанияларга қўнғироқ қилиб, касалхонага ким ёрдам бера олиши мумкинлигини аниқлашга уринди. Исиннова компанияси асосчиси Кристиан Фракасси ушбу сўровга жавоб қайтарди ва касалхонага 3D-принтер олиб келди.

Қайд этилишича, ускуна етказиб берувчи компания касалхонага клапанлар чизмасини тақдим этишдан бош тортган. Бу эса ишни бироз қийинлаштирган. Шунга қарамай тизим ишлаб кетган ва чоп қилинган клапанлар ўнлаб инсонлар ҳаётини сақлаб қолган.

Кейинроқ Исиннова компаниясига маҳаллий Лонати компанияси ҳам ёрдам бериб, юзга яқин клапанларни чоп этган.

Шундан сўнг Темпореллига 3D-принтерга эга бошқа компаниялар ҳам мурожаат қилиб, ёрдам бериш истагини билдирган. Бироқ Фаблаб директорининг сўзларига кўра, касалхонага клапанлар бошқа керак эмас.

Фракасси ҳам ушбу вазиятда жамоасида танлаш имкони бўлмагани, ёрдам ҳақидаги таклифни рад этиш «қотиллик акти» бўлиши мумкинлигини айтиб ўтган.

У шунингдек, ўзи ва жамоасини даҳо ёки қаҳрамон деб атамасликларини ҳамда «ҳақиқий қаҳрамонлар» — шифокорларга урғу бериш кераклигини таъкидлаган.

Аввалроқ Италияда коронавирусдан бир суткада қарийб 350 киши вафот этгани ҳақида хабар берилган эди.

Мамлакатда коронавирус тарқалиши бошланганидан бери касалликдан жами 2158 нафар одам вафот этган. Охирги бир суткада 414 нафар одам коронавирусдан тузалган. Соғайган беморларнинг умумий сони 2,7 мингни ташкил этмоқда.