Ижтимоий тармоқларда 16 март, душанба куни, Андижон вилоятининг Олтинкўл туманида яшовчи 14 нафар фуқаро коронавирус аниқланган шифокор аёл билан Франциядан бир самолётда учиб келганлиги ҳамда улар назоратда эканлиги тўғрисида норасмий хабарлар тарқалган. Андижон вилоят ҳокимлиги мазкур хабарларга муносабат билдирди.
Маълум қилинишича, Андижон вилояти ҳокими Шуҳрат Абдураҳмонов назоратида 11 та тегишли ташкилотнинг раҳбарлари ва ўринбосарларидан иборат вилоят штаби ташкил этилган бўлиб, штаб мутахассисларига тегишли вазифа ва кўрсатмалар берилган, тизимли ишлар ташкил этилмоқда. Шунингдек, кунлик ахборот ва таҳлилий маълумотлар тақдим этилмоқда.
Коронавирус инфекциясининг Андижон вилояти ҳудудига кириб келиши ва тарқалишининг олдини олиш бўйича вилоят штаби берган маълумотларга кўра, ушбу норасмий хабарлар асоссиз ҳисобланади. Ушбу фуқаролар коронавирус аниқланган шифокор аёл билан бир самолётда Франциядан келмаганлиги аниқланди.
Вилоят штаби маълумотларига кўра, Олтинкўл туманида жойлашган захира изоляторида 21 нафар фуқаро бўлиб, улар Андижон вилоятининг турли жойларида яшайди. Ушбу фуқаролар Туркия, Россиядан қайтган, шунинг учун карантинга олинган, уларда касаллик аломатлари йўқ. Уларда тана ҳарорати кўтарилиши, қуруқ йўтал, нафас қисиши ва бошқа белгилар мавжуд эмас. Уларнинг ҳар бири 14 кунлик карантин тугагандан кейин қонда вирус бор ёки йўқлиги қайта текширилади ва шундан сўнг маълумотнома тақдим этилган ҳолда уйига жавоб берилади.Мавзуга доир: «Ниқоблар тўғри тақилмаса вирусдан ҳимоя қилмайди». Тиббиёт ниқобларининг фойда ва зарари ҳақида
Эслатиб ўтамиз, Ўзбекистонда коронавирус юқтириб олганлар сони саккиз кишига етди.
Аввалроқ Сирдарё ҳокими Ғофуржон Мирзаев озиқ-овқат маҳсулотлари нархи билан танишиш учун Гулистондаги бозорни айлангани ҳақида хабар берилган эди.
Изоҳ (0)