Фото: Тошкентдаги уч қаватли остин-устун йўлда ҳаракат бошланди. Кўприк яқин вақт ичида тўлиқ очилиши кутилмоқда

Тошкент шаҳридаги Яшнобод ва Мирзо Улуғбек туманлари, Махтумқули, Темур Малик, Паркент ва Оҳангарон кўчалари туташмасида қурилаётган уч қаватли кўприкнинг қурилиш ишларини яқин вақт ичида якунлаш режалаштирилган.

Икки туманни бир-бирига боғлайдиган ва шу ҳудуддаги тирбандликларни бартараф этиш учун қурилаётган кўприк ва туннелнинг умумий лойиҳа қиймати 140 миллиард сўмни ташкил этади. Унинг доирасида битта туннел, иккита йўл ўтказгич, битта ҳалқасимон йўл ва битта кўприк қурилди. Айни пайтда бу ерда сўнгги пардозлаш, асфальтлаш, тротуар плиталарини ётқизиш ҳамда атрофни ободонлаштириш ишларининг якуний босқичи ниҳоясига етмоқда.

Ҳудудда умумий миқдори 61 минг квадрат метр асфальт, 14,5 минг метр тротуар йўлаклари ётқизиш, 19,5 минг квадрат метр ободонлаштириш ишлари олиб борилди, 180 дона янги ёритгич қўйилган. Айни пайтда 1600 нафар муҳандис ва ишчи ходимлар ишламоқда. Жараённи жадаллаштириш ва енгиллаштириш учун 260 дан ортиқ техника жалб қилинган.

Уч қаватли кўприкнинг биринчи қисмида Паркент—Оҳангарон шоҳкўчаси йўналишидаги 502 метрли туннелни кўриш мумкин.

Иккинчи қаватда доирасимон йўл ўтказгич жой олган.

Учинчи қаватда Махтумқули кўчасидан Тошкент вилоятига чиқиб кетувчи йўл ўтган бўлиб, унинг узунлиги 593 метрни ташкил этади.

2018 йилнинг май ойида қурилиши бошланиб, ўша йилнинг июнь ойида Ўзбекистон Президенти Шавкат Мирзиёевга тақдим этилган мазкур лойиҳа аввалига 2019 йил августигача, кейин эса йил охиригача қуриб битказилиши режалаштирилган эди.

«Дарё» мухбири 17 март куни очилиши белгиланган кўприк ҳудудида бўлиб, фоторепортаж тайёрлади.