Қозоғистоннинг Чимкент шаҳридаги эски фосфор заводи ҳудудида жойлашган контейнерда беш нафар Ўзбекистон фуқароси ис газидан заҳарланди. Бу ҳақда Kazinform хабар берди.
Маълум қилинишича, мазкур контейнер яшаш жойи сифатида жиҳозланган, унга иситиш қурилмалари ўрнатилмаган, газ ўтказилмаган. Ўзбекистон фуқароси бўлган беш нафар ишчи хонани иситиш учун у ерга чиқинди қутисини ўрнатган ҳамда унинг ичида олов ёққан. Олов ёниши натижасида ажралиб чиққан ис газидан заҳарланиб, уларнинг тўрт нафари вафот этган, яна бир нафар фуқаро оғир аҳволда касалхонага ётқизилган.
Воқеа жойига Қозоғистон фавқулодда вазиятлар, ёнғин хавфсизлиги ва ички ишлар идоралари ходимлари етиб борган.
Аввалроқ Сирдарё ва Фарғонада ис газидан заҳарланиш оқибатида тўрт киши вафот этган эди. Шунингдек, Россиядаги конда содир бўлган ёнғин оқибатида 3 нафар ўзбекистонлик ҳалок бўлган эди.
Изоҳ (0)