Ўзбекистонда коронавирус инфекциясини юқтириб олиш билан боғлиқ ҳолатлар сони саккизтага етди. Бу ҳақда Соғлиқни сақлаш вазирлиги ҳузуридаги Санитария-эпидемиологик осойишталик агентлиги маълум қилди.
Аввалроқ, 15 март куни бир муддат аввал Францияда бўлиб қайтган ўзбекистонлик аёлда коронавирус аниқлангани ҳақида хабар берилган эди. Кейинчалик унинг ўғли, қизи, турмуш ўртоғи ва неварасида ҳам вирус аниқлангани маълум қилинган эди.
Олиб борилган таҳлил натижаларига кўра, Соғлиқни сақлаш вазирлигидан маълум қилишларича, «ушбу бемор билан мулоқотда бўлган қариндошида ҳам коронавирус қайд этилган». Қариндошнинг айнан ким эканлигига расмий ахборотда аниқлик киритилмаган.
Бундан ташқари, 14 март куни Uzbekistan Airways’нинг Лондон—Тошкент рейсида келган Ўзбекистон фуқаросида ҳам коронавирус аниқланган. Вазирлик ахборотида ҳам, агентлик баёнотида ҳам фуқаронинг жинсига, у билан бир рейсда неча киши келганига, уларнинг ҳолати ва аҳволига аниқлик киритилмаган.
Қайд этиш жоиз, аввалроқ 15 март куни соат 05:15 да Uzbekistan Airways’нинг Истанбул—Тошкент рейсида келган Ўзбекистон фуқаросида ҳам коронавирус қайд этилгани ҳақида хабар берилган эди. Шундай қилиб, Ўзбекистондаги саккиз беморнинг олти нафари бир хонадонда бўлган шахслар, яна бири Туркиядан, бошқаси Буюк Британиядан келган фуқаролар.
«Беморлар билан мулоқотда бўлганларнинг рўйхати олиниб, уларнинг саломатлиги устидан ҳам тиббий назорат ўрнатилди», — дейилади Соғлиқни сақлаш вазирлиги ахборотида.
Мавзуга доир:
Изоҳ (0)