Наманган шаҳар ҳокимлигида коронавирус тарқалишининг олдини олиш бўйича махсус штаб ташкил этилди. Бу ҳақда «Дарё» мухбири Азизбек Абдувалиев хабар бермоқда.
Мазкур штаб кўрсатмасига биноан, вилоят марказидаги барча бозорлар ва жамоат транспорти воситалари дезинфекциядан ўтказилди. Бозорларнинг узлуксиз ишлаши таъминланди.
Шаҳардаги барча маҳалла фуқаролар йиғинлари, дўконлар, аҳоли гавжум бўладиган манзилларга коронавирусдан сақланиш усуллари кўрсатилган варақалар ёпиштирилди.
Реклама таблоларида эса Соғлиқни сақлаш вазирлиги томонидан тайёрланган видеороликлар айлантирилмоқда.
Шаҳар ҳокимлиги штаби коронавирус ваҳимаси туфайли нарх-наво асоссиз ошиб кетишининг олдини олиш бўйича ҳаракатларни ҳам мувофиқлаштирмоқда. Бунинг учун ташкил этилган ишонч телефонига ҳозиргача 100 дан ортиқ мурожаат келиб тушди.
Мурожаатларда асосан бозор ва дўконларда картошка, ун, ёғ қимматлагани, Тошкент—Наманган йўналишидаги йўлкиралар ошгани, дорихоналарда тиббиёт ниқоблари ва қўлларни дезинфекцияловчи воситалар танқислиги юзага келганлиги билдирилган.
Шаҳардаги энг йирик Чорсу ва Сардоба бозорларидаги ўрганишлар чоғида картошка 2,5 минг сўмдан 5 минг сўмгача сотилаётгани маълум бўлди. Афсуски, картошкани қоплаб харид қилиб, сунъий тақчиллик келиб чиқиши ва нарх-наво ошишига харидорларнинг ўзи ҳам сабабчи бўлиб қолмоқда.
Ваҳоланки, вилоят марказига картошка етиштиришга ихтисослашган Янгиқўрғон тумани ва Россиядан 15 март, якшанба куни, ҳам катта миқдорда картошка етказиб келинган.
Шаҳар мутасаддилари ижтимоий тармоқлар орқали аҳолига мурожаат қилиб, ваҳимага ўрин йўқлиги, Наманганда етарлича озиқ-овқат захиралари мавжудлигини таъкидламоқда. Бу уринишлар ўз самарасини бериши ва маҳаллий бозорлар, дўконлардаги нарх-наво тез орада барқарорлашишига умид билдирилмоқда.
Изоҳ (0)