Ўзбекистонда 15 март, якшанба куни, коронавирус билан касалланиш ҳолати қайд этилди. Коронавирус билан касаллангани Ўзбекистонда аниқланган илк бемор — аёл киши, Тошкент шаҳридан. «Дарё» манбасининг маълум қилишича, у Францияда бир ҳафтадан ортиқ бўлиб, сўнг Ватанга қайтган. Аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. Бемор аёл туфайли 150 киши изоляцияга олинди. Уларнинг тўққиз нафари аёлнинг оила аъзолари.
Ўзбекистонда коронавирус қайд этилиши муносабати билан республикада баъзи карантин ва чеклов табдирлари ўтказилмоқда. Хусусан Наврўз байрами бекор қилинди, барча таълим муассасалари таътилга чиқди. Коронавирус тарқалишининг олдини олиш мақсадида 16 мартдан бошлаб хорижий давлатлар билан барча авиарейслар бекор қилинади, автотранспорт воситасида Ўзбекистонга кириш-чиқиш тўхтатилади.
Бош прокуратура матбуот хизмати карантин ва чеклов тадбирларини бузганлик ва касаллик ўчоғига борганлик ҳамда беморлар билан мулоқотда бўлганлик ҳақидаги маълумотларни яширганлик учун жиноий жавобгарлик мавжудлигини эслатиб ўтди.
Ўзбекистон Республикаси Жиноят кодексининг Санитарияга оид қонун ҳужжатларини ёки эпидемияга қарши кураш қоидаларини бузиш, яъни 257-1-моддасида қайд этилган жиноятни содир этганлик учун базавий ҳисоблаш миқдорининг эллик бараваридан юз бараваригача миқдорда жарима солиш ёки беш йилдан саккиз йилгача озодликдан маҳрум қилиш жазосини қўллаш назарда тутилган.
Шунингдек, Ўзбекистон Республикаси Маъмурий жавобгарлик тўғрисидаги кодексининг Эпидемияларга қарши кураш қоидаларини бузиш, яъни 54-моддасида қайд этилган ҳуқуқбузарликни содир этганлик ҳолати бўйича фуқароларга базавий ҳисоблаш миқдорининг уч бараваридан беш бараваригача, мансабдор шахсларга эса ўн бараваридан ўн беш бараваригача миқдорда жарима солишга сабаб бўлиши кўрсатилган.
Эслатиб ўтамиз, 15 март ҳолатига кўра, дунё бўйича 156 мингдан ортиқ коронавирус билан касалланиш ҳолати аниқланган. Шу кунгача беморларнинг 5833 нафари вафот этган, салкам 74 минг соғайган. Бугунги кунда коронавируснинг асосий ўчоқлари Хитой эмас, балки Италия, Эрон, Жанубий Корея, Испания, Германия ва Франция бўлиб турибди.
Изоҳ (0)