«Бундай пайтда ҳазил кетмайди». Абдулла Арипов коронавирус бўйича асоссиз маълумот тарқатганларга чора кўрилиши ҳақида

Ўзбекистонга кириб келган коронавирус инфекцияси тўғрисида кунига икки ёки уч марта ОАВга ахборот етказиш тизими йўлга қўйилади. Бу ҳақда 15 март, якшанба куни, Ўзбекистон бош вазири Абдулла Арипов иштирокида коронавирус тарқалишининг олдини олиш бўйича кўрилаётган чораларга бағишлаган матбуот анжуманида маълум қилинди.

«Дарё» мухбирининг хабар беришича, бош вазир ОАВ вакилларини коронавирус билан боғлиқ турли асоссиз, фуқароларни ваҳимага солувчи маълумотлар тарқатмасликка чақирди.

«Агар бирортаси ўзи билганича, нотўғри фикрлар айтиб, аҳолини ваҳимага соладиган ахборот тарқатса, жиноий жавобгарликка тортилади. Қонунчиликда ҳам бу борада жазо чораси назарда тутилган моддалар бор. Бизни турли техник чораларни кўришга мажбур қилманг. Керак бўлса, умуман эфирга чиқмайдиган қилиб қўямиз. Интернет тармоғидан ҳам ўчиришимиз мумкин. Техник воситаларимиз етарли.

Бошқаларни қўрқитиш ва қўрқувга солиш билан ҳар хил маълумотни тарқатмоқчи бўлаётганлар оммавий ахборот воситаси қандай кучга эга эканлигини яхши билади. Шу билан бирга буни ишлатиш, яъни ахборот тарқатиш жуда оғир масъулият. Буни қонунларни яхши тушунган, расмий ахборот ва ёлғон хабарларнинг фарқини яхши билувчи, масъулиятни зиммасига оладиган одам қилиши керак. Бундай пайтда ҳазил кетмайди.

Кеча биттаси қайсидир мамлакатда коронавирусга қарши мол пешобини ичишганини ёзиб, чиқарибди. Бу нима деган гап? Шуни бизнинг Telegram канали тарқатяпти. Мана шундай беҳаё, ақлсиз, бефаросат нарсаларни тарқатмоқчи бўлганларга мен яна қайтариб айтаман, ким нима деса, десин, ушбу ёлғон хабарларни тарқатиб, аҳолида саросима юзага келтиришга уринганларга қатъий чора кўрамиз», — деди Арипов.

Бош вазир матбуот анжумани давомида карантин шароитида нархларни сунъий оширган «савдогарлар»га нисбатан жиноий жазо тайинланишини, автомобиллар нархи ошишига қарши намойиш ўтказиш ҳақида хабар тарқатган йигитга жазо чораси кўрилганини ҳам айтиб ўтган.

Шунингдек, тадбирда Ўзбекистон коронавирус сабаб авиа ва автоқатновларни тўхтатиши, ҳукуматнинг барча диний ташкилотларга диний йиғинларни вақтинча ўтказмаслик бўйича тавсия билан чиққани маълум қилинган.

Коронавирус сабаб Ўзбекистонда Наврўз сайиллари бекор қилинган, барча мактаблар, боғчалар ва ОТМлар карантинга ёпилиши ҳақида хабар берилган.