Ўзбекистонда коронавирус аниқланди, Наврўз бекор қилинди, мактаб ва боғчалар таътилга чиқди. Асосий маълумотлар

Ўзбекистонда коронавирусга чалиниш билан боғлиқ биринчи ҳолат қайд этилди. 11 март, чоршанба куни, Uzbekistan Airways’нинг Париж—Тошкент рейси билан учиб келган аёл (унинг ўзи асли олий тоифали шифокор экани, хусусий тиббиёт муассасасига ҳам эга экани айтилмоқда) 15 мартга ўтар кечаси Республика Вирусология институтига мурожаат қилган (аэропортда текширув вақтида у соғлом чиққан). Чамаси икки соатлар ўтиб, таҳлил натижалар чиққан ва унинг коронавирусга чалингани маълум бўлган.

Бемор билан бир рейсда 45 йўловчи бўлган («Интерфакс»нинг ёзишича, яна тўққиз нафар экипаж аъзоси ҳам бор), уларнинг ярми чет эллик транзит йўловчилар (улар Тошкентдан ўз манзили томон учиб кетган). Бош вазир Абдулла Арипов иштирокидаги матбуот анжуманида аёлда коронавирус аниқлангач, унинг 9 нафар оила аъзоси, шунингдек, рейснинг Ўзбекистонда қолган йўловчилари ва улар билан мулоқотда бўлган одамлар — жами 150 киши изоляцияга олингани айтилди.

Шунингдек, Ўзбекистон фуқароларининг чет давлатларга чиқиши, чет эл фуқароларининг Ўзбекистонга кириши тақиқланди. Чет давлатлардаги ўзбекистонликларнинг қайтиши учун шарт-шароит яратилиши, хусусан, чартер рейслар йўлга қўйилиши маълум қилинди. 16 мартдан сўнг чартер рейслар билан Ўзбекистонга қайтарилган ватандошлар икки ҳафталик карантинга жойлаштирилади.

Коронавирус сабаб Наврўз сайиллари бекор қилинди, таълим муассасаларида таътил эълон қилинди. Бош вазирнинг маълум қилишича, барча спорт (масалан, Суперлига), маданий (жумладан, концерт) ва бошқа тадбирлар, шунингдек, Наврўз тантаналари ва у билан боғлиқ бошқа оммавий маросимлар ҳам бекор қилинади (лекин тўйларни ўтказиш мумкин). Фуқароларга одам гавжум бўладиган жойларга боришдан тийилиш тавсия қилинмоқда. Барча давлат ва нодавлат ташкилотларга мажлислар ўтказишни тўхтатиш ҳақида топшириқ берилди, диний ташкилотларга эса ҳукумат диний йиғинларни тўхтатиб туриш илтимоси билан мурожаат қилган.

Болалар боғчалар, ўрта мактаблар ва олий таълим муассасалари (давлатникими, хусусийми, фарқи йўқ) карантинга ёпилади. Ўқувчи ва талабаларга икки ҳафталик — 1 апрелга қадар давом этадиган таътил берилади. Агар коронавирус тарқалиши билан боғлиқ вазият оғирлашадиган бўлса, 1 апрелдан сўнг онлайн ёки телевидение орқали дарс машғулотларини йўлга қўйиш бўйича чора-тадбирлар кўрилмоқда. Айни вақтда вилоятларда истиқомат қилувчи талабаларга йўл харажати учун 50 фоизгача чегирмалар берилиши айтилди.

Ҳукумат нарх-навонинг асоссиз оширилишига қарши курашишга ваъда берди. Жумладан, карантин вақтида нарх-навони, айниқса, дори-дармон ва тиббиёт воситалари нархини асоссиз оширганларга кескин чоралар кўрилади, бу жараёнга Бош прокуратура ҳузуридаги департамент ҳамда Давлат солиқ қўмитаси жалб қилинади. Абдулла Ариповнинг алоҳида қайд этишича, озиқ-овқат ва бошқа захиралар етарли даражада ғамланган. Дорихоналарда юз ниқоблари тақчиллигини тўхтатиш учун бу маҳсулотни ишлаб чиқариш 10 баробарга оширилади, 16 мартдан эса уни экспорт қилиш тўхтатилади.

Абдулла Арипов кўрилаётган чораларни фавқулодда ҳолат деб баҳоламаслигини билдирди. У аҳолини ваҳимага тушмасликка чақириб, барча ҳудудлар коронавирусни текшириш учун асбоб-ускуналар, тест воситалари ҳамда ҳимоя воситалари билан таъминланганини, бу каби чоралар жаҳоннинг барча мамлакатларида кўрилаётганини таъкидлади. Ўзида касаллик аломатларини сезган фуқароларга уйдан чиқмай, телефон орқали шифокорлар билан боғланиш тавсия қилинди. Таъкидланишича, 16 мартдан 1003 телефони орқали коронавирус бўйича ягона қўллаб-қувватлаш тармоғи ишга тушади.