O‘zbekistonda 15-mart, yakshanba kuni, koronavirus bilan kasallanish holati qayd etildi. Koronavirus bilan kasallangani O‘zbekistonda aniqlangan ilk bemor — ayol kishi, Toshkent shahridan. “Daryo” manbasining ma’lum qilishicha, u Fransiyada bir haftadan ortiq bo‘lib, so‘ng Vatanga qaytgan. Ayol qaytgan reysda, birlamchi ma’lumotlarga ko‘ra, 48 yo‘lovchi, shuningdek, ekipaj a’zolari bo‘lgan. Bemor ayol tufayli 150 kishi izolyatsiyaga olindi. Ularning to‘qqiz nafari ayolning oila a’zolari.
O‘zbekistonda koronavirus qayd etilishi munosabati bilan respublikada ba’zi karantin va cheklov tabdirlari o‘tkazilmoqda. Xususan Navro‘z bayrami bekor qilindi, barcha ta’lim muassasalari ta’tilga chiqdi. Koronavirus tarqalishining oldini olish maqsadida 16-martdan boshlab xorijiy davlatlar bilan barcha aviareyslar bekor qilinadi, avtotransport vositasida O‘zbekistonga kirish-chiqish to‘xtatiladi.
Bosh prokuratura matbuot xizmati karantin va cheklov tadbirlarini buzganlik va kasallik o‘chog‘iga borganlik hamda bemorlar bilan muloqotda bo‘lganlik haqidagi ma’lumotlarni yashirganlik uchun jinoiy javobgarlik mavjudligini eslatib o‘tdi.
O‘zbekiston Respublikasi Jinoyat kodeksining Sanitariyaga oid qonun hujjatlarini yoki epidemiyaga qarshi kurash qoidalarini buzish, ya’ni 257-1-moddasida qayd etilgan jinoyatni sodir etganlik uchun bazaviy hisoblash miqdorining ellik baravaridan yuz baravarigacha miqdorda jarima solish yoki besh yildan sakkiz yilgacha ozodlikdan mahrum qilish jazosini qo‘llash nazarda tutilgan.
Shuningdek, O‘zbekiston Respublikasi Ma’muriy javobgarlik to‘g‘risidagi kodeksining Epidemiyalarga qarshi kurash qoidalarini buzish, ya’ni 54-moddasida qayd etilgan huquqbuzarlikni sodir etganlik holati bo‘yicha fuqarolarga bazaviy hisoblash miqdorining uch baravaridan besh baravarigacha, mansabdor shaxslarga esa o‘n baravaridan o‘n besh baravarigacha miqdorda jarima solishga sabab bo‘lishi ko‘rsatilgan.
Eslatib o‘tamiz, 15-mart holatiga ko‘ra, dunyo bo‘yicha 156 mingdan ortiq koronavirus bilan kasallanish holati aniqlangan. Shu kungacha bemorlarning 5833 nafari vafot etgan, salkam 74 ming sog‘aygan. Bugungi kunda koronavirusning asosiy o‘choqlari Xitoy emas, balki Italiya, Eron, Janubiy Koreya, Ispaniya, Germaniya va Fransiya bo‘lib turibdi.
Izoh (0)