3 март, сешанба куни, миллионлаб Эрон фуқаролари мамлакат Соғлиқни сақлаш вазирлиги номидан SMS хабар олди, деб ёзади Meduza.
SMS хабарда фуқароларга ўзи ва яқинларида коронавирус мавжудлигини аниқлаш имконини берувчи АC19 дастурини смартфонига ўрнатиш таклиф қилинганди.
Дастур яратувчилари бир неча сония ичида фойдаланувчининг сўровига асосланиб, одам касал ёки йўқлигини аниқлашга ваъда берди.
АC19 ни юклаб олгандан сўнг фойдаланувчилардан телефон рақами ҳамда уларнинг жойлашуви ҳақида маълумот тўплаш учун рухсат сўрашади.
Қайд этилишича, ушбу савол форс тилида эмас, инглиз тилида бўлгани учун аксарият фойдаланувчилар гап нима ҳақда кетаётганлигини тушунмайди.
Бундан ташқари, Эронда Android’га асосланган қурилма фойдаланувчиларининг 40 фоизи операцион тизимнинг эски версиясидан фойдаланади, шунинг учун улар дастурнинг геожойлашув маълумотларини тўплаш учун рухсат сўраганлиги ҳақида ҳеч қандай хабарни кўрмайди.
Лондонда яшовчи Эрон фаоли Наримон Ғарибнинг айтишича, ушбу дастур фойдаланувчиларнинг бир нуқтадан иккинчи нуқтага ҳаракатини реал вақтда кузатиш имконини беради.
Ҳозирга қадар неча киши АC19 дастурини юклаб олгани номаълум.
Эрон бунга қадар ҳам фуқароларни кузатувчи дастурлардан фойдаланган. 2018 йилда мамлакат ҳукумати Golden Telegram ва HotGram деб номланган икки дастурни яратган, улар 30 миллионга яқин фуқаро томонидан юклаб олинган.
Иккита дастур ҳам Эронда оммалашган Telegram мессенжеридек кўринишга эга бўлган. Telegram мессенжери шундан сўнг Эрон дастурлари хавфсиз бўлмаслиги мумкинлиги ҳақида эълон тарқатди.
Аввалроқ Эрон олий етакчисининг маслаҳатчиси коронавирус сабаб карантинга олингани ҳақида хабар берилган эди.
Эрон коронавирус туфайли Халқаро валюта жамғармасидан 5 миллиард доллар миқдоридаги ёрдам сўраган. COVID-19 коронавируси тарқалиши оқибатида мамлакатда 70 мингга яқин маҳбус озодликка чиқарилган. Эронда касалликдан ҳимояланаман деб, 7 киши метанол спиртини ичиб вафот этгани ҳам хабар қилинган эди.
14 март кунидан эътиборан Хитой, Жанубий Корея, Италия, Эрон, Франция ва Испания фуқароларининг ҳамда ушбу мамлакатларда доимий яшовчи фуқаролиги бўлмаган шахсларнинг Ўзбекистонга кириши вақтинча чекланди.
Изоҳ (0)