Eronda koronavirusni aniqlaydigan dastur yaratildi. U millionlab odamlarning harakatini nazorat qilmoqda

3-mart, seshanba kuni, millionlab Eron fuqarolari mamlakat Sog‘liqni saqlash vazirligi nomidan SMS xabar oldi, deb yozadi Meduza.

SMS xabarda fuqarolarga o‘zi va yaqinlarida koronavirus mavjudligini aniqlash imkonini beruvchi AC19 dasturini smartfoniga o‘rnatish taklif qilingandi.

Dastur yaratuvchilari bir necha soniya ichida foydalanuvchining so‘roviga asoslanib, odam kasal yoki yo‘qligini aniqlashga va’da berdi.

AC19 ni yuklab olgandan so‘ng foydalanuvchilardan telefon raqami hamda ularning joylashuvi haqida ma’lumot to‘plash uchun ruxsat so‘rashadi.

Qayd etilishicha, ushbu savol fors tilida emas, ingliz tilida bo‘lgani uchun aksariyat foydalanuvchilar gap nima haqda ketayotganligini tushunmaydi.

Bundan tashqari, Eronda Android’ga asoslangan qurilma foydalanuvchilarining 40 foizi operatsion tizimning eski versiyasidan foydalanadi, shuning uchun ular dasturning geojoylashuv ma’lumotlarini to‘plash uchun ruxsat so‘raganligi haqida hech qanday xabarni ko‘rmaydi.

Londonda yashovchi Eron faoli Narimon G‘aribning aytishicha, ushbu dastur foydalanuvchilarning bir nuqtadan ikkinchi nuqtaga harakatini real vaqtda kuzatish imkonini beradi.

Hozirga qadar necha kishi AC19 dasturini yuklab olgani noma’lum.

Eron bunga qadar ham fuqarolarni kuzatuvchi dasturlardan foydalangan. 2018-yilda mamlakat hukumati Golden Telegram va HotGram deb nomlangan ikki dasturni yaratgan, ular 30 millionga yaqin fuqaro tomonidan yuklab olingan.

Ikkita dastur ham Eronda ommalashgan Telegram messenjeridek ko‘rinishga ega bo‘lgan. Telegram messenjeri shundan so‘ng Eron dasturlari xavfsiz bo‘lmasligi mumkinligi haqida e’lon tarqatdi.

Avvalroq Eron oliy yetakchisining maslahatchisi koronavirus sabab karantinga olingani haqida xabar berilgan edi.

Eron koronavirus tufayli Xalqaro valyuta jamg‘armasidan 5 milliard dollar miqdoridagi yordam so‘ragan. COVID-19 koronavirusi tarqalishi oqibatida mamlakatda 70 mingga yaqin mahbus ozodlikka chiqarilgan. Eronda kasallikdan himoyalanaman deb, 7 kishi metanol spirtini ichib vafot etgani ham xabar qilingan edi.

14-mart kunidan e’tiboran Xitoy, Janubiy Koreya, Italiya, Eron, Fransiya va Ispaniya fuqarolarining hamda ushbu mamlakatlarda doimiy yashovchi fuqaroligi bo‘lmagan shaxslarning O‘zbekistonga kirishi vaqtincha cheklandi.