O‘zbekistonga koronavirusning kirib kelishi va tarqalishining oldini olish chora-tadbirlar dasturini tayyorlash bo‘yicha respublika maxsus komissiyasining 12-mart kuni bo‘lib o‘tgan yig‘ilishi bayoniga muvofiq, O‘zbekiston 14-martdan Fransiya, Ispaniya va Buyuk Britaniya bilan aviaqatnovlarni to‘xtatadi. Bu haqda “Daryo”ning hukumatdagi manbasi ma’lum qildi.
Ma’lum bo‘lishicha, 14-martdan boshlab, Xitoy, Janubiy Koreya, Italiya, Eron, Fransiya va Ispaniya fuqarolarining hamda ushbu mamlakatlarda doimiy yashovchi fuqaroligi bo‘lmagan shaxslarning O‘zbekistonga kirishi vaqtincha cheklanadi.
Shuningdek, 14-martdan boshlab chegara o‘tkazish punktlari orqali so‘nggi 14 kun davomida mazkur davlatlarga tashrif buyurgan chet el fuqarolari va fuqaroligi bo‘lmagan shaxslarning ham O‘zbekistonga kirishi vaqtincha cheklanadi.
Ma’lum qilinishicha, joriy etilayotgan cheklovlar diplomatik va xizmat pasporti egalariga qo‘llanilmaydi. Shuningdek, cheklovlar sanab o‘tilgan olti davlatning fuqarolari hamda shu davlatlarda doimiy istiqomat qiluvchi fuqaroligi bo‘lmagan shaxslarga, agar ular O‘zbekistonga tashrif buyurganga qadar 14 kun davomida ushbu mamlakatlarga tashrif buyurmagan bo‘lsa, qo‘llanilmaydi.
Zarurat tug‘ilgan taqdirda, sanab o‘tilgan davlatlardan O‘zbekiston fuqarolarini olib kelish uchun charter reyslar tashkil etilishi mumkin.
Bundan tashqari, vazirlik va idoralarga koronavirus infeksiyasi bilan bog‘liq epidemik vaziyat barqarorlashgunga qadar rahbarlar va xodimlarga chet el safarlarini imkon qadar cheklash tavsiya qilingan
Yuqorida sanab o‘tilgan davlatlardan charter reyslar bilan O‘zbekistonga olib kelinadigan fuqarolar Toshkent viloyati hududidagi belgilangan tibbiy muassasalarga 14 kunlik karantinga joylashtiriladi.
Shuningdek, respublika hududida o‘tkazilishi rejalashtirilgan xalqaro tadbirlar va sport musobaqalari vaqtincha to‘xtatiladi. Mahalliy darajada rejalashtirilgan ommaviy tadbirlarni qisqartirish choralari ko‘riladi.
Eslatib o‘tamiz, avvalroq O‘zbekistonda koronavirus tarqalgan 14 davlatdan kelgan fuqarolarni karantinga olish haqida qaror qabul qilingan edi.
O‘zbekiston Prezidenti Shavkat Mirziyoyev 11-mart, chorshanba kuni, koronavirusga qarshi kurash bo‘yicha Sog‘liqni saqlash vazirligiga topshiriqlar berdi hamda mazkur virus haqida gapirdi. Shuningdek, Shavkat Mirziyoyev Eron—Turkmaniston chegarasida qolib ketgan haydovchilarni O‘zbekistonga qaytarish bo‘yicha alohida ko‘rsatma berdi.
JSST 11-mart kuni koronavirusning pandemiya darajasiga yetganini ma’lum qildi. Mazkur tashkilot vakili esa koronavirusning O‘zbekistonga kirib kelishi ehtimoli yuqori ekanini bildirdi.
So‘nggi kunlarda ijtimoiy tarmoqlarda O‘zbekistonga kornavirus kirib kelgani haqida tarqalgan xabarlar Sog‘liqni salqash vazirligi tomonidan rad etildi. AOKA esa OAV va blogerlarni koronavirus haqida tasdiqlanmagan xabarlar tarqatmaslikka chaqirdi.
Avvalroq, Uzbekistan Airways aviakompaniyasi 1-mart kuni Seuldan Toshkentga Janubiy Koreyadagi O‘zbekiston fuqarolarining ilk guruhi qabul qilgani haqida xabar berilgandi. Milliy aviakompaniya 1-martdan boshlab Janubiy Koreyada koronavirus avj olishi sababli Seulga bo‘lgan qatnovlarni vaqtincha to‘xtatib turgani haqida xabar berilgandi. Shuningdek, Uzbekistan Airways Yaponiya va Italiyada koronavirus avj olishi sababli Uzbekistan Airways aviakompaniyasi 2020-yilning 1-martidan boshlab Tokio va Rimga bo‘lgan yo‘nalishdagi qatnovlarni vaqtincha to‘xtatgani ma’lum qilingandi. Bundan tashqari, Jidda va Madinaga bo‘lgan aviaqatnovlar hamda Afg‘oniston va Eron bilan ham aviaqatnovlar vaqtinchalik to‘xtatilgan.