2020 йил бошланганидан буён Топ-500 таликка кирувчи дунёнинг энг бадавлат инсонлари коронавирус тарқалиши ҳамда нефть нархининг тушиб кетиши сабаб қарийб 1 триллион доллар йўқотди, деб хабар берди Bloomberg.
Маълумотларга кўра, 12 март куни дунёнинг энг бадавлат 500 инсони йўқотган маблағлар миқдори 331 миллиард долларни ташкил этган, бу эса бу агентликнинг энг бой одамлари рейтингидаги саккиз йиллик тарихида кузатилган энг катта бир кунлик пасайиш ҳисобланади.
Шундай қилиб, йил бошидан буён Топ-500 га кирувчи бизнесменлар жами 950 миллиард доллар (умумий маблағларининг 16 фоизи) йўқотган.
Йил бошида дунёнинг энг бадавлат инсоларини умумий бойлиги 6,1 триллион долларга баҳоланган эди. «Ушбу маблағлар коронавирус пандемияси сабаб юзага келган қўрқув ҳамда нефть нархининг тушиб кетиши оқибатида йўқотилди», — дейилади хабарда.
Бу каби йўқотишлар биринчи навбатда Louis Vuitton Moët Hennessy компанияи раҳбари Бернар Арнога таъсир қилди — у 9,5 миллиард долларидан айрилган. Шунингдек, Amazon асосчиси Жефф Безос (8,1 миллиард доллар), Microsoft асосчиси Билл Гейтс (6,9 миллиард доллар) йўқотган.
Таъкидланишича, Топ-500 рейтингига кирувчи россиялик тадбиркорлар бир кун ичида 15,4 миллиард долларидан айрилган.
Аввалроқ Американинг асосий индекслари Нью-Йорк фонд биржаларидаги 12 март кунги савдо натижаларига кўра деярли 10 фоизга тушиб кетгани ҳақида хабар берилганди. Moody’s рейтинг агентлиги вируснинг 2008—2010 йиллардаги молиявий инқироздан кўра жиддийроқ оқибатларга олиб келиши мумкинлиги тўғрисида огоҳлантирган.
Изоҳ (0)