Коронавирус ва спорт: бекор қилинаётган мусобақалар, вирусни юқтирган «Ювентус» ҳимоячиси ҳақида сўнгги маълумотлар

 

Жаҳон соғлиқни сақлаш ташкилоти дунё бўйлаб тарқалаётган коронавирус эпидемияси пандемияга айланганини эълон қилди.

Сўнгги икки ҳафта давомида Хитойдан ташқарида коронавирус билан зарарланиш ҳолатлари сони 13 мартага ошди, касаллик қайд этилган мамлакатлар сони эса уч баравар кўпайди. ЖССТ раҳбари Тедрос Гебрейесуснинг маълум қилишича, айни пайтда дунёда коронавирус юқтирганлар сони 118 минг кишидан ортиб кетган.

Маълумот учун, пандемия эпидемик касалликнинг бир ёки бир неча мамлакат, қитъа ёки континентда ёппасига тарқалиши ҳисобланади. Пандемик тарқалиш ҳаво-томчи йўли билан юқиб, инкубацион даври қисқа юқумли касалликларга хос.

Коронавирус нафақат ҳаваскор, балки профессионал спорт ва спортчиларга ҳам таъсир кўрсатишда давом этмоқда. Шу боисдан қатор мусобақалар бекор қилинмоқда. Қуйида шу кунга қадар бекор қилинган халқаро спорт мусобақалари, шунингдек, коронавируснинг умуман спорт соҳасига таъсири ҳақида сўнгги маълумотлар тақдим этилади.

«Ювентус» ҳимоячиси Даниэле Ругани коронавирус юқтириб олгани маълум бўлди. Клуб буни расман тасдиқлади.

25 ёшли Руганининг коронавирус бўйича топширган тест натижалари ижобий натижа тақдим этган. «Ювентус» айни дамда карантин чораларини кўраётгани таъкидланган. Қоидаларга кўра, клуб у билан алоқада бўлган барчанинг рўйхатини тузиши ва уларни карантинга олиши лозим.

Маълумотларга кўра, «Ювентус» иштирокидаги ўйинлар номаълум муддатга қолдирилади.

Роналду коронавирус сабаб «Ювентус» сафида эмас. У Мадейрада қолган

Криштиану 11 март кунидаги Турин клуби машғулотларида иштирок этмаган. Клуб матбуот хизмати хабарига кўра, Роналду фавқулодда ҳолат сабаб ўз ватанида қолмоқда.

Жамоа ҳужумчиси Гонсало Игуаин эса жароҳатидан фориғ бўлиб, индивидуал дастур асосида машғулот олиб бормоқда. Ярим ҳимоячи Родриго Бентанкур эса чап сонидаги жароҳат сабаб машғулотларда қатнашмаган.

А Серия ўйинлари қолдирилди, Италия клубларининг Европа Чемпионлар Лигаси ва Европа Лигасидаги иштироки сўроқ остида

Коронавируснинг кенг тарқалаши сабаб Италияда барча спорт мусобақалари, шу жумладан футбол бўйича А Серия баҳслари ҳам тўхтатиб қўйилди.

Европа Лигаси 1/8 финал илк баҳсидан ўрин олган икки ўйин қолдирилди. Иккала ўйин ҳам Италия клублари иштирокида эди.

УЕФА расмий сайтида маълум қилинишича, «Интер»—«Хетафе» ва «Севилья»—«Рома» учрашувлари номаълум муддатга қолдирилган. Мазкур икки баҳс 12 март, пайшанба куни ўтказилиши керак эди.

Сабаби Испания ҳукумати коронавирус туфайли Италияга кириб-чиқиш борасида чеклов ўрнатган. Аввалроқ Испания ҳукумати «Рома» клубига мамлакатга киришни тақиқлагани маълум бўлганди.

Англияда коронавирус

«Манчестер Сити»—«Арсенал» учрашуви қолдирилди. АПЛнинг 28-туридан ўрин олган баҳс 11 март куни ўтказилиши керак эди. 27 февраль куни «Арсенал» Европа Лигаси доирасида «Олимпиакос» билан тўқнаш келган. Грек клуби хўжайини Евангелос Маринакис учрашувдан сўнг «Арсенал» футболчилари ва клуб штабидаги бир неча киши билан алоқада бўлган.  ​

АПЛнинг қолган тур учрашувлари мухлисларсиз стадионда ўтказилиши бўйича қарор қабул қилинди. Мухлислар ҳатто футбол учрашувларини ресторан ва кафеларда ҳам кўра олмайди. Боиси жамоат жойларида жонли трансляциялар ҳам тақиқланди. Мухлислар учрашувларни энди фақат телевизор орқали кўриши мумкин.

Испания ва Франция чемпионатларининг навбатдаги тур ўйинлари томошабинларсиз ўтади. Саудия Арабистонидаги барча спорт мусобақалари томошабинларсиз ўтказилади. Қирғизистонда оммавий спорт мусобақаларини ўтказиш вақтинча тақиқланди. Токио мезбонлигида ўтадиган 2020 йилги Олимпия ва Паралимпия ўйинлари коронавирус сабаб йил охирида ўтказилиши мумкин. Бу ҳақда Токиодаги Олимпиада ва Паралимпиада ишлари бўйича вазир Сейко Хасимото маълум қилди.

Халқаро хоккей федерацияси (ИИҲФ) коронавирус сабаб бешта халқаро мусобақани бекор қилди. Унга кўра, ёшлар ўртасидаги Жаҳон чемпионати А гуруҳидаги (22—28 март, Таллин) ва II дивизионнинг Б гуруҳидаги (23—29 март, София) баҳслар, III дивизионнинг А ва Б гуруҳларидаги ўйинлар бекор қилинган. Шунингдек, аёллар ўртасидаги Жаҳон биринчилигидан ўрин олган ва 28 мартдан 3 апрелга қадар ўтиши керак бўлган иккита мусобақа ҳам бекор бўлган.

АҚШда коровируснинг устидан кулган баскетболчи касалликни юқтириб олди. NBA чемпионатни тўхтатди

АҚШ миллий баскетбол ассоциацияси (NBA) «Юта» жамоаси баскетболчиси Руди Гоберда коронавирус аниқлангани сабаб 2019/20 йилга мавсум ўйинларини вақтинча тўхтатди.

11 март куни «Оклохома»—«Юта» учрашуви сўнгги паллада бекор қилинди. Бунга Solt-Лейк-Сити шаҳри клуби баскетболчиси коронавирусга чалингани сабаб бўлган. Хабарларга кўра, бу ўйинчи — Руди Гобер.

Қизиғи шундаки, Руди Гобер 9 март куни коронавирус атрофидаги ваҳималар устидан кулиб, матбуот анжумани вақтида барча микрофонларга тегиниб чиққанди.

Шу муносабат билан NBA 12 март, пайшанба кунидан бошлаб чемпионат ўйинларини тўхтатди.

Ўзбекистонда ҳам халқаро тадбирлар ва спорт мусобақалари вақтинча тўхтатилди

Халқаро мусобақаларда Ўзбекистон терма жамоа аъзоларининг иштироки ҳамда тизим ходимларининг хорижий хизмат сафарлари вазирлик билан келишилган ҳолда амалга оширилиши белгилаб қўйилди.

Шунингдек, спорт турлари бўйича республика спорт мусобақалари (чемпионат ва кубоклар) Ўзбекистон Республикаси Соғлиқни сақлаш вазирлиги, ҳудудий спорт мусобақаларини эса ҳудудий соғлиқни сақлаш бошқармалари билан келишган ҳолда ўтказиш вазифаси юклатилди.