Ҳиндистонда уч ёшли болада коронавирус аниқланди

Ҳиндистоннинг Керала штатида шифокорлар уч ёшли болага коронавирус ташхисини қўйди, деб хабар берди «РИА Новости».

Бола ота-онаси билан Италиядан қайтгач, унда касаллик аломатлари пайдо бўлган.

Бу Ҳиндистонда коронавирус билан касалланиш билан боғлиқ ҳолатларнинг 41-си бўлди. Уч киши касалликдан тузалган ва уйга жавоб берилган.

7 март куни Италиядан Ҳиндистонга учиб келган боланинг тана ҳарорати ўлчанганида унда иситма аниқланган. Шу сабаб оила карантинга олиниб, бола қайта текширилган. Таҳлил натижалари унда коронавирус мавжудлигини кўрсатган.

Хитойда эпидемия бошлаганидан буён коронавирусга чалинганларнинг умумий сони 80 735 кишига етган. Жами 58,6 минг бемор тузалгани айтилмоқда. Дунё бўйлаб коронавирус инфекцияси кириб борган мамлакатлар сони 100 дан ошиб кетди.

Айни вақтда коронавирусга чалинганлар сонининг фоиз кўрсаткичи бўйича Жанубий Корея дунёда биринчи бўлиб турибди — у ерда ҳар 1 миллион аҳолига 142,1 нафар тасдиқланган бемор тўғри келмоқда. Иккинчи ўринда — Италия (121,9 бемор), учинчи ўринда— Эрон (80,9 бемор), тўртинчи ўринда эса Хитой (58,3 бемор).

8 март куни Италия бош вазири Жузеппе Конте коронавирус инфекцияси тарқалиши муносабати билан мамлакатнинг 14 та провинциясида кириш-чиқишни ёпган эди. 3 апрелга қадар ёпилган ҳудудлар орасида Ломбардия, Римини, Модена, Новара ва бошқалар бор. Бундан ташқари, 14 та провинцияда мактаб, музей, спорт заллари ёпилган, диний маросимлар тўхтатилган.