Brent маркасидаги нефтнинг нархи бир баррел учун 20 долларга қадар тушиб кетиши мумкин. Бу ҳақда Американинг Goldman Sachs инвестиция банки таҳлилчиларига таяниб, Bloomberg хабар берди.
Улар фақат айрим ишлаб чиқарувчилар қандай нархларда ишлаши мумкинлигини ҳисобга олиб, шу каби хулосага келган. Бундан ташқари, банк иккинчи ва учинчи чорак учун ўз ҳисоб-китобларини пасайтириб, Brent баррелининг нархи 30 доллардан ошмаслигини маълум қилган.
Goldman Sachs таҳлилчилари нархнинг тушиб кетиши Россия ва ОПЕК ўртасидаги нефть келишувининг бекор бўлгани билан боғламоқда. «Ўйлашимизча, ОПЕК ва Россия ўтган дам олиш кунлари нархлар урушини бошлади», — дейилади ҳисоботда.
Эслатиб ўтамиз, 6 март куни Вена шаҳрида ОПЕК мамлакатлари ва нефть қазиб олишни қисқартириш бўйича келишувни қўллаб-қувватлаган давлатлар вакилларининг учрашуви бўлиб ўтди. ОПЕК мамлакатлари нефть қазиб олишни қўшимча равишда кунига 1,5 миллион баррелга қисқартиришни таклиф қилди. Шундан 0,5 миллион баррели Россия ва ОПЕК таркибига кирмайдиган бошқа давлатлар ҳиссасига тўғри келиши керак. Қайд этилишича, Россия нефть қазиб олишни қисқартириш ниятида эмас.
9 март кунги очиқ савдоларда Brent маркасидаги нефть нархи 38 долларни ташкил этди. Коронавирус сабабли Brent ва WTI маркаларидаги нефть нархи 2011 йилдан буён кузатилган энг катта пасайишга учраган. Нефть нархи 2,5 йил ичида илк бора 49 доллардан ҳам арзонлашган.
Изоҳ (0)