Португалия президенти Марселу Ребелу де Соуза коронавирус сабаб икки ҳафтага мўлжалланган тадбирларни бекор қилиб, кўнгилли равишда карантинга кетишга қарор қилди, деб хабар беради «РИА Новости».
Таъкидланишича, президент бироз муддат олдин COVID-19 коронавируси аниқлангани сабаб ёпилган мактабнинг бир гуруҳ ўқувчилари билан учрашган. Маълумотларга кўра, касалликка чалинган болакай ва унинг синфдошлари президент саройига ташриф буюрганлар орасида бўлмаган.
«Президент ўзида вирус аломатлари бўлмаса ҳам икки ҳафталик карантинга кетишга қарор қилди. Бу хорижга уюштирилиши режалаштирилган сафарларга ҳам таъсир кўрсатади», — дейилади баёнотда.
71 ёшли президент шифокорлар назорати остида бўлади. Президент карантинда бўлишига қарамай, ўз қароргоҳида ишлашни давом эттиради.
Мамлакат Соғлиқни сақлаш бош бошқармасининг маълумотларига кўра, Португалияда янги турдаги коронавирус билан касалланган 30 нафар бемор аниқланган.
Коронавирус инфекцияси кириб борган мамлакатлар сони 100 дан ошиб кетди, касалланиш ҳолатлари жаҳон бўйича 105 минг кишига етган. Сўнгги бир неча сутка давомида коронавирус инфекцияси билан касалланиш ҳолатлари Болгария, Коста-Рика, Молдова, Француз Гвианаси, Мальдив ороллари, Мальта, Фарер ороллари, Мартиника, шунингдек, Албанияда аниқланди.
Изоҳ (0)