«Автостат-Инфо» таҳлил агентлиги экспертлари Москвада рўйхатдан ўтказилган барча автомобилларни қайта санаб чиқди, деб ёзади Motor.
Таҳлилчиларнинг сўзларига кўра, Москва шаҳрида 3 808 384 та енгил автомобиль қайд этилган. Жорий 2020 йилнинг бошида автомобилларнинг умумий сонининг 82,6 фоизини (3 146 361 та) хорижий автомобиллар ташкил этган. Москваликларнинг 17,4 фоизи (662 023 та автомобиль) Россияда ишлаб чиқарилган автомобилларда юради.
Қайд этилишича, москваликлар ўртасида энг оммабоп машина бу Ford Focus автомобилидир. Шаҳарда 89 337 та шундай автомобиль қайд этилган. Рўйхатнинг иккинчи ўрнини Кореянинг ҳамёнбоп седани Hyundai Solaris (85 715 та), учинчи ўрнини эса Kia Rio (79 841 та) эгаллаган.
Москваликлар ўртасида оммабоп автомобиллар бешталигига Чехиянинг Skoda ҳамда Octaivia лифтбеклари ҳам кирган. Москвада 73 746 та бундай автомобиллар қайд этилган. Шунингдек, Volkswagen Polo седани ҳам 62 260 та кўрсаткич билан кучли бешталикдан ўрин олган.
Москвада энг оммабоп Россияда ишлаб чиқарилган автомобиль Lada 2109 бўлди. У рейтингда 61 031 та кўрсаткич билан олтинчи ўринни эгаллаган.
Еттинчи ўринни Nissan x-Trail йўлтанламаси (54 953 та автомобиль), саккизинчи ўринни — Lada 2107 (54 928 та автомобиль), тўққизинчи ўринни ҳам маҳаллий модел Lada 2106 (54 836 та автомобиль) эгаллади. Япониянинг Toyota Camry бизнес седани ўнталикка якун ясайди, Москвада бундай автомобилдан 52 643 таси рўйхатдан ўтказилган.
Мавзуга доир: Фотогалерея: Европа давлатларидаги энг оммабоп машиналар