Осиё тараққиёт банки Ўзбекистонда жамоат транспорти ва шахсий транспорт воситалари соҳасида электр транспорт воситаларини босқичма-босқич жорий этиш бўйича тавсиялар беради ва техник ёрдам кўрсатади. Бу ҳақда 21 февраль куни Энергетика вазирлигида банк маслаҳат кенгаши вакиллари билан бўлиб ўтган учрашувда маълум қилинди.
Осиё тараққиёт банки миссиясининг мақсади Ўзбекистонда электр транспортини ривожлантириш сиёсати ва стратегиясини ишлаб чиқиш бўйича маслаҳат бериш, электр транспорт воситаларининг атроф-муҳитга таъсирини таҳлил қилиш ҳамда солиқ, тарифлаш, субсидия ажратиш каби соҳаларда жаҳон амалиётини ҳисобга олган ҳолда иқтисодий оқибатларни баҳолашдир.
Учрашув давомида техник ёрдамнинг асосий йўналишлари, жамоат ҳамда шахсий транспорт воситалари соҳасига электр транспорт воситаларини босқичма-босқич жорий этиш, бу борада тегишли стандартларни амалга ошириш ҳамда зарур инфратузилмани ривожлантириш каби масалалар муҳокама этилган.
Шунингдек, Ўзбекистонда қуёш манбаларининг катта имкониятларини ҳисобга олган ҳолда ёқилғи қуйиш станцияларининг турларини аниқлаш, ресурсларни тежаш зарурияти ва батареялар ишлаб чиқариш бўйича тавсиялар беришнинг асосий йўналишлари белгилаб олинган.
Эслатиб ўтамиз, Ўзбекистон Президентининг «Ўзбекистон Республикасида туристик хизматларни янада диверсификация қилиш чора-тадбирлари тўғрисида»ги қарори лойиҳасида электромобиллар учун қувватлаш станцияларини қуриш мажбурияти шаҳарсозлик нормалари қаторига киритиш таклиф қилинган.
Аввалроқ Tashkent City ҳудудида ППХ ходимлари электромобилда ҳаракатланишни бошлаган эди. Андижон ИИБ эса «Хан» электромобилини синовдан ўтказган эди. «Ўзавтосаноат» электромобиллар учун инфратузилма яратиш устида ишлаётганини маълум қилган.
Изоҳ (0)