16 мартдан Тошкентдан Татаристонга мунтазам авиақатновлар йўлга қўйилади

Татаристондаги Бегишево аэропорти ва Nordwind Airlines компанияси 2020 йилнинг 16 мартидан бошлаб Ўзбекистон пойтахтига мунтазам авиарейсларни йўлга қўяди. Татаристондан Тошкентга парвозлар ҳар ҳафтанинг душанба кунларида амалга оширилади. Бу ҳақда «ТАСС» хабар қилди.

Бегишево аэропорти Тукаев туманидаги Кама дарёси соҳилларида Нижнекамскдан 21, Набережний Челновдан 24 километр узоқликда жойлашган.

«Николай Лемаев номидаги Бегишево халқаро аэропорти парвозлар географиясини кенгайтиришда давом этмоқда, 16 мартдан бошлаб Nordwind компанияси билан ҳамкорликда Ўзбекистон пойтахти — Тошкентга мунтазам авиақатновлар йўлга қўйилмоқда. Тошкентга парвозлар Boeing 737-800 ҳаво кемаларида ҳафтанинг душанба кунлари амалга оширилади. Бегишеводан учиш вақти соат 11:55 (маҳаллий вақт), Тошкентдан Татаристонга келиш вақти эса соат 18:10 да (маҳаллий вақт) амалга оширилади», — дейилади Татаристон аэропорти берган хабарда.Учиш вақти 2 соат-у 55 дақиқа, чипталар нархи 7652 рублдан бошланади. Ушбу тўлов ичига 8 килограммгача оғирликдаги буюмлар ҳамда 20 килограммгача юклар киритилган. Авиакомпания учун Тошкент Москва, Симферополь, Анталия ва Монастирдан кейинги бешинчи рейс бўлади.2019 йил якунларига кўра, Бегишево 785 минг нафар йўловчига хизматлар кўрсатган ва аэропортда 2018 йилдаги кўрсаткичдан 1 фоизга ўсиш кузатилган.