Қозоғистоннинг Ақтўбе вилоятидаги Карабутак—Костанай трассасида 25 февраль, сешанба куни, 45 нафар йўловчи — Ўзбекистон ва Тожикистон фуқаролари бўлган автобус ағдарилиб кетгани ҳақида хабар берилган эди. Ўзбекистон Ташқи ишлар вазирлиги мазкур ҳолат бўйича хабар берди.
Маълум қилинишича, Ўзбекистоннинг Ақтау шаҳридаги Бош консулхонаси 26 февраль, чоршанба куни, Чимкент—Екатеринбург йўналиши бўйлаб ҳаракатланаётган ва йўловчилар орасида 14 нафар Ўзбекистон фуқароси бўлган автобус Ақтўбе вилояти ҳудудида ағдарилиб кетгани тўғрисидаги ОАВда тарқалган хабарни тасдиқлаган.
Қайд этилишича, ҳодиса оқибатида ҳеч ким жабрланмаган, тиббий ёрдамга эҳтиёж сезилмаган. Қозоғистоннинг йўл полицияси ва фавқулодда вазиятлар бўйича органлари ходимларининг ёрдами билан йўловчилар эвакуация қилинган, автобусга техник хизмат кўрсатилган ва йўналишини давом эттирган.
ТИВ Консуллик-ҳуқуқий департаменти Ўзбекистон фуқароларига автобусларда ёки автомобиль транспортининг бошқа турларида қишги вақтда Қозоғистонга киришда ёки унинг ҳудудидан ўтишда эҳтимолий хатарларни ҳисобга олиш ва тегишли чоралар кўриш зарурлигини эслатган.
Аввалроқ Қозоғистонда 42 нафар ўзбекистонлик бўлган автобус қорда қолиб кетган эди.
Изоҳ (0)