16-martdan Toshkentdan Tataristonga muntazam aviaqatnovlar yo‘lga qo‘yiladi

Tataristondagi Begishevo aeroporti va Nordwind Airlines kompaniyasi 2020-yilning 16-martidan boshlab O‘zbekiston poytaxtiga muntazam aviareyslarni yo‘lga qo‘yadi. Tataristondan Toshkentga parvozlar har haftaning dushanba kunlarida amalga oshiriladi. Bu haqda “TASS” xabar qildi.

Begishevo aeroporti Tukayev tumanidagi Kama daryosi sohillarida Nijnekamskdan 21, Naberejniy Chelnovdan 24 kilometr uzoqlikda joylashgan.

“Nikolay Lemayev nomidagi Begishevo xalqaro aeroporti parvozlar geografiyasini kengaytirishda davom etmoqda, 16-martdan boshlab Nordwind kompaniyasi bilan hamkorlikda O‘zbekiston poytaxti — Toshkentga muntazam aviaqatnovlar yo‘lga qo‘yilmoqda. Toshkentga parvozlar Boeing 737-800 havo kemalarida haftaning dushanba kunlari amalga oshiriladi. Begishevodan uchish vaqti soat 11:55 (mahalliy vaqt), Toshkentdan Tataristonga kelish vaqti esa soat 18:10 da (mahalliy vaqt) amalga oshiriladi”, — deyiladi Tatariston aeroporti bergan xabarda.Uchish vaqti 2 soat-u 55 daqiqa, chiptalar narxi 7652 rubldan boshlanadi. Ushbu to‘lov ichiga 8 kilogrammgacha og‘irlikdagi buyumlar hamda 20 kilogrammgacha yuklar kiritilgan. Aviakompaniya uchun Toshkent Moskva, Simferopol, Antaliya va Monastirdan keyingi beshinchi reys bo‘ladi.2019-yil yakunlariga ko‘ra, Begishevo 785 ming nafar yo‘lovchiga xizmatlar ko‘rsatgan va aeroportda 2018-yildagi ko‘rsatkichdan 1 foizga o‘sish kuzatilgan.