Олий Мажлис Сенатига ташриф буюрувчиларнинг иситмаси бор-йўқлиги (тана ҳароратининг юқорилиги COVID-19 коронавирус инфекциясининг белгиларидан бири ҳисобланади) тепловизорлар ёрдамида текширилмоқда.
Юқори палатанинг иккинчи ялпи мажлисини ёритиш учун 28 февраль, жума куни, Сенатга борган «Дарё» мухбирларининг тана ҳарорати бошқа нашрларнинг мухбирлариники каби масофадан туриб текширилган.
Журналистлар ва бошқа ташрифчиларни тепловизор билан текшириб турган санитария-эпидемиология хизмати ходимининг маълум қилишича, бу — шамоллаш касалликларининг олдини олишга қаратилган чорадир.
Бундан ташқари, Давлат хавфсизлик хизмати ходимлари юзларига ниқоб таққан ҳолда хизмат олиб борган. «Gazeta.uz» мухбири кириш жойида қўриқчилардан бири бинони исириқ билан тутатаётганига гувоҳ бўлган. Бино лифтларига нафас олиш йўллари юқумли касалликлари профилактикаси ҳақида огоҳлантиришлар осилган.
«Gazeta.uz»нинг қўшимча қилишича, Сенатга ташриф буюрувчиларни тепловизорлар билан текшириш амалиёти февралнинг дастлабки кунларидаёқ бошланган.
Санитария-эпидемиологик осойишталик агентлиги ҳузуридаги коронавирус бўйича штабдан «Gazeta.uz»га маълум қилишларича, ҳозирги вақтда кўчма тепловизорлардан фойдаланилмоқда. Яқин вақт ичида Туркиядан стационар қурилмалар сотиб олиниши ва мамлакат аэропортларига ўрнатилиши кутилмоқда.
Сенатга киришда тепловизорлар билан текшириш жараёнига муносабат билдираркан, штаб вакиллари буни профилактика чораси деб атади. Қўшимча қилишларича, Ўзбекистонда коронавирус бўйича эпидемиологик ҳолат осойишта. Аввалроқ агентлик Ўзбекистонни коронавирусдан холи қолаётгани ҳақида хабар берган эди.
Изоҳ (0)