Ўзбекистон халқ таълими вазири Шерзод Шерматов ўқувчилар сочи узунлигини чизғичда ўлчаш билан боғлиқ ҳолат акс этган ва ижтимоий тармоқларда тарқалган суратларга муносабат билдирди.
Вазирнинг ёзишича, «Қош қўяман деб кўз чиқариш» мақоли айнан шу ҳолатни яхши тасвирлайди. «Ҳеч қайси топшириқда болаларнинг сочини чизғичда ўлчаб, расмга олиб, Telegram’да тарқатиш керак деб ёзилмаган. Кимдир қаердадир жуда қаттиқ ишлаётганини кўрсатиш учун шундай қилган, шекилли», — дейди вазирлик раҳбари.
«Қани энди, таълим сифатини яхшилаш ва ўз малакасини ошириш бўйича қарорларни шунчалик жон куйдириб ижро этишса жойларда», — дея ўз фикрини якунлаган Шерзод Шерматов.
Эслатиб ўтамиз, Норматив-ҳуқуқий ҳужжатлар лойиҳалари муҳокамаси порталига «Ўзбекистон Республикаси ҳукуматининг айрим қарорларига ўзгартишлар ва қўшимчалар киритиш тўғрисида»ги қарор лойиҳаси жойлаштирилган эди. Унда нодавлат таълим хизматлари кўрсатиш соҳасидаги фаолиятни лицензиялаш тартиби тўғрисидаги низом ва «Давлат умумий ўрта таълим муассасалари ўқувчиларини замонавий ягона мактаб формаси билан таъминлаш чора-тадбирлари тўғрисида»ги қарорларга ўзгартириш ва қўшимчалар киритиш кўзда тутилган.
Агар қарор лойиҳаси таклиф этилаётган таҳрирда қабул қилинса, нодавлат таълим хизматлари кўрсатувчи юридик шахслар ўз фаолиятини амалга оширишда таълим олувчиларнинг кийимларига қуйидагича шартлар қўйиши керак бўлади:
- турли дин ва конфессиялар ҳамда турли субмаданиятларга мансубликни акс эттирувчи элементларни (ҳижоб, кипа, кашая, хоч ва бошқалар) қўшишга ҳамда ҳуқуқни муҳофаза қилувчи органлар ходимларига хос бўлган ҳарбий ва идоравий формали кийим-бош кийиб юришга йўл қўймаслик;
- ўғил бола таълим олувчиларнинг ташкилотга танасининг очиқ қисмига татуировка туширган ёки пирсинг қилган, соқол қўйган, сочи 2-3 сантиметрдан узун бўлган ва ёрқин рангларга бўялган ҳолда келишларига;
- қиз бола таълим олувчиларнинг ташкилотга танасининг очиқ қисмига татуировка туширган ёки пирсинг қилган, сочини ёрқин рангларга бўяган, юзини кўзга ташланадиган даражада макияж қилган, қулоғига биттадан ортиқ сирға таққан, бармоқларига узук таққан, қўл тирноқларини бўяган ва узун қилиб ўстирган ҳолда келишига йўл қўймаслик.
Изоҳ (0)