O‘zbekiston investitsiyalar va tashqi savdo vaziri Alisher Abduvaliyev Ukraina infratuzilma vaziri o‘rinbosari Oleg Yushenko bilan mamlakatlar o‘rtasida aviaqatnovlarni qayta tiklash masalasini muhokama qildi. Bu haqda Ukraina Infratuzilma vazirligi matbuot xizmati xabar berdi.
Foto: Ukraina Infratuzilma vazirligi matbuot xizmati
Oleg Yushenkoning ta’kidlashicha, Ukrainaning aviatsiya transporti sohasidagi siyosati hamkor davlatlar, xususan, O‘zbekiston bilan aviaqatnovlar bozorini erkinlashtirishga qaratilgan.
“Ukraina O‘zbekison bilan har bir tomondan haftasiga muntazam yetti marta reyslar qatnovini tezroq qayta yo‘lga qo‘yishdan manfaatdor”, — deydi Oleg Yushenko.
“Alisher Abduvaliyev transport infratuzilmasi sohasida ikki tomonlama hamkorlikni rivojlantirishning ahamiyatini ta’kidlab, Ukraina va O‘zbekiston o‘rtasida aviaqatnovlarni tez orada yo‘lga qo‘yilishiga umid bildirdi”, — deyiladi xabarda.
Iqtisodiy rivojlanish, savdo va qishloq xo‘jaligi vazirining o‘rinbosari, Ukraina savdo vakili Taras Kachka Alisher Abduvaliyev bilan bo‘lib o‘tgan uchrashuv yakunida Toshkentda 9-10-aprel kunlari o‘zbek-ukrain hukumatlararo komissiyasining yig‘ilishi o‘tkazilishini ma’lum qilgandi.
2019-yilning oktabr oyida Toshkentdan Kiyevga charter reyslarni tashkillashtirish rejasi bilan chiqqan Charter Flights Group kompaniyasi O‘zbekiston va Ukraina o‘rtasidagi aviaqatnovlarni qayta tiklay olmagan edi.
2017-yilning dekabr oyida Ukraina bilan doimiy aviaqatnovlarning tiklanishi haqida xabarlar tarqalgan edi. Ikki mamlakat aviatsiya idoralari delegatsiyalari muzokaralar olib borgan. Biroq O‘zbekistonning Parvozlar xavfsizligini nazorat qilish davlat inspeksiyasi tomonlar o‘rtasida hal qilinmagan masalalar borligi, ularning hal qilinishi bilan tomonlar muzokaralarga qaytishini ma’lum qilgan edi.
