Наманган вилоятида ўзларини ДХХ ходими деб таништирган тўрт нафар киши бир фуқаронинг 150 минг АҚШ доллари пулини фирибгарлик йўли билан ўзлаштириб олган. Бу ҳақда Ички ишлар вазирлиги матбуот хизмати хабар қилган.
Наманган вилояти Чуст туманида 4 нафар фирибгар шахс жабрланувчининг машинасида 200 минг АҚШ доллари борлигини билиб қолган ва уни зимдан кузатиб юрган. Қулай пайтни пойлаб унинг машинасини тўхтатиб, ўзларини ДХХ ходимлари деб таништирган ва автомобиль эгаси пуллар унга тегишли эмаслигини, уларни бошқа фуқарога етказиб бериши кераклигини айтганига қарамай ундан ушбу пулларни талаб қилган.
Сохта ДХХ ходимлари жабрланувчи пуллардан 150 минг доллар ажратса, бу ҳақда ҳужжат расмийлаштирмаслик ваъдасини бериб, уни ишонтиришга уринган.
Пулларни беришни истамасанг, «200 минг долларни Қирғизистонга олиб ўтмоқчи бўлган гумондор сифатида сенга жиноят иши очамиз, машинангни мусодара қиламиз», — дея автомобиль ҳайдовчисини қўрқитган.
Ҳайдовчи керакли пулларни бериб, ўзи Қирғизистонга қочиб кетган. Пулларнинг эгаси вазият бўйича ИИБга мурожаат қилгач фирибгарлар қўлга олинди ва уларга қарши жиноят иши очилди, дейилади «Воқеа жойи» кўрсатувидаги лавҳада.
Изоҳ (0)