Бир карднинг ўзида фожиавий якунланган икки жанг. Бокс тарихидаги қора тун ҳақида

2 август куни Токиода Ямато Хата ва Сигетоси Котари ўртасида иккинчи ярим енгил вазн тоифасида OPBF (Oriental and Pacific Boxing Federation) жаҳон чемпионлиги учун кечган профессионал бокс оқшоми бўлиб ўтди. Тадбир Teiken Promotions промоутерлик компанияси томонидан ташкил этилди.

Жанг дуранг билан якунланди — нокаутчи Хата ғалаба қозона олмади, аммо чемпионликни ўзида сақлаб қолди. 12 раунд якунлангач, Котари ўзини ёмон ҳис қилган ва ринг бурчагида ҳушидан кетган. У дарҳол касалхонага етказилди, у ерда субдурал гематома ташхиси қўйилди. Боксчи зудлик билан операция қилинди, бироқ бир неча кундан сўнг 28 ёшли спортчи вафот этди. Бу ҳақда WBO хабар берди: “Бокс олами 2 август куни бўлиб ўтган чемпионлик жангида олган жароҳатлари туфайли вафот этган япониялик боксчи Сигетоси Котари вафоти муносабати билан мотам тутмоқда. Ринг жангчиси. Орамизни жуда эрта тарк этди. Унинг оиласига ҳамдардлик билдирамиз”. 

Одамлар бу қайғули хабарни ҳазм қилишга улгурмасдан, орқасидан яна бир нохуш хабар келди. Худди шу кардда Хиромаса Уракава ҳам жанг қилганди. Унинг рақиби Ёдзи Сайто бўлди. Сайтонинг бир нечта нокдаунларидан сўнг, жанг саккизинчи раундда тўхтатилди. Бундан ташқари, Уракава ўша жангда ҳакамлар ҳисоб-китобига кўра олдинда бораётганди. Жангдан сўнг Хиромаса ҳам шошилинч равишда касалхонага ётқизилган ва унга субдурал гематома ташхиси қўйилган. Боксчи операция қилинди (краниотомия), аммо вафот этди.

Шундан сўнг, WBC раҳбари Маурисио Сулаймон сўзга чиқди: “Бокс олами Японияда бир кардда жанг қилган икки боксчининг фожиали ўлими муносабати билан ҳайратда ва чуқур қайғуда. Уларнинг хотираси обод бўлсин”.

Бу ҳали ҳаммаси эмас. Баъзи манбалар, жумладан The Ring нашрининг ёзишича, кечанинг марказий жангида Котари билан дуранг қайд этган Ямато Хата ҳам олган жароҳатлари туфайли касалхонага ётқизилган ва ҳозирда кома ҳолатида. Бутун бокс олами учун мутлақо қора кун.

Субдурал гематома нима? Бунда қон миянинг қаттиқ ва тўрсимон пардалари орасида тўпланади ва бунинг ҳисобига мия ичи босими ошади ва шикастланиши мумкин. Масалан, бир пайтлар россиялик боксчи Магомед Абдусаломов ҳам шундай жароҳат олган эди. Ва умуман олганда, бу, афсуски, бокс учун нисбатан кенг тарқалган жароҳат. Шифокорларнинг таъкидлашича, профессионал спортчилар дуч келадиган экстремал вазн пойгалари бундай қон кетиш хавфини сезиларли даражада оширади, чунки ликвор (мия ва орқа мияни ўраб турган ва уларни механик таъсирлардан ҳимоя қиладиган суюқлик) ҳажми камаяди ва мия анча заиф бўлиб қолади.

2 август куни содир бўлган воқеадан сўнг Япония бокс комиссияси OPBF чемпионлик жанглари 12 раунд эмас, балки 10 раунд давом этишини эълон қилди. Бундан ташқари, боксчиларга кўпроқ хавфсизликни таъминлаш мақсадида вазн ўлчаш ва гидратация қоидалари қайта кўриб чиқилади.

Албатта, бу йўналишда фақат Япония комиссиясигина қандайдир қадамлар қўймаслигини лозим. Масалан, аввалроқ боксчи Жон Куни рингда олган жароҳатларидан сўнг шу тарзда вафот этганди. Умуман олганда, фожиали ҳодисалар кўп, фақат бу сафар бир вақтнинг ўзида битта карддан уч боксчи касалхонага тушиб қолди, иккита нафари эса вафот этди. Бокс бу жуда хавфли спорт турларидан бири эканлиги яна бир бор ёдга олинди.