Қирғизистон Бош прокуратураси республика собиқ президенти Алмазбек Атамбаевни қўлга олиш бўйича махсус операция вақтида юз берган оммавий тартибсизликлар иши иштирокчиларига айблов ҳужжатларини расман топширди. Бу ҳақда собиқ президентнинг маслаҳатчиси ва айбланувчилардан бири Қундуз Жўлдубаева Facebook’даги саҳифасида маълум қилди.
«Қўйтош воқеалари бўйича жиноят иши иштирокчиларига айблов ҳужжатлари прокуратура томонидан расман тақдим этилди», — деб ёзди. Жўлдубаеванинг ёзишича, айбланувчилар рўйхатида 14 киши — собиқ президент ва унинг яқин тарафдорлари, хусусан, парламентнинг бир неча амалдаги ва собиқ депутатлари, президент девонининг собиқ раҳбари Фарид Ниёзов ҳам бор.
Улар Қўйтошдаги воқеалар вақтида оммавий тартибсизликларни келтириб чиқариш ва одамларни гаровга олишда айбланмоқда. Аввалроқ Бишкекнинг Биринчи Май тумани суди идораси Жўлдубаева, Ниёзов, парламент депутати Ирина Карамушкина ва парламентнинг собиқ икки депутати Равшан Жээнбеков ва Мээрбек Мискенбаевни уй қамоғида сақлаш муддатини 9 апрелга қадар узайтирилганини маълум қилган эди.
Қирғизистон махсус хизматлари 2019 йилнинг 7—8 август кунлари мамлакат собиқ президенти Алмазбек Атамбаевни пойтахт Бишкекдан 20 километр масофада жойлашган Қўйтош қишлоғидаги қароргоҳида ушлаш бўйича операция ўтказган эди. Собиқ давлат раҳбарининг тарафдорлари ва ҳуқуқ-тартибот органлари ўртасидаги икки кунлик тўқнашувлар давомида махсус хизматнинг бир зобити ҳалок бўлган, 136 киши тан жароҳати олган эди.
Атамбаев 2017 йилги президент сайлови якунларига кўра, ҳокимиятни вориси ва яқин сафдоши Сўронбай Жээнбековга топширган эди. Бироқ кўп ўтмай собиқ президент жамоаси аъзоларига нисбатан кетма-кет жиноят ишлари қўзғатилган эди. Атамбаев собиқ президент мақомидан маҳрум қилиниб, оғир ва ўта оғир жиноятларни содир этишда айбланган эди. Атамбаев ўзига ва сафдошларига қўйилаётган айбловлар сиёсий мазмунга эгалигини бир неча бор таъкидлаган эди.
Изоҳ (0)