Qirg‘iziston Bosh prokuraturasi respublika sobiq prezidenti Almazbek Atambayevni qo‘lga olish bo‘yicha maxsus operatsiya vaqtida yuz bergan ommaviy tartibsizliklar ishi ishtirokchilariga ayblov hujjatlarini rasman topshirdi. Bu haqda sobiq prezidentning maslahatchisi va ayblanuvchilardan biri Qunduz Jo‘ldubayeva Facebook’dagi sahifasida ma’lum qildi.
“Qo‘ytosh voqealari bo‘yicha jinoyat ishi ishtirokchilariga ayblov hujjatlari prokuratura tomonidan rasman taqdim etildi”, — deb yozdi. Jo‘ldubayevaning yozishicha, ayblanuvchilar ro‘yxatida 14 kishi — sobiq prezident va uning yaqin tarafdorlari, xususan, parlamentning bir necha amaldagi va sobiq deputatlari, prezident devonining sobiq rahbari Farid Niyozov ham bor.
Ular Qo‘ytoshdagi voqealar vaqtida ommaviy tartibsizliklarni keltirib chiqarish va odamlarni garovga olishda ayblanmoqda. Avvalroq Bishkekning Birinchi May tumani sudi idorasi Jo‘ldubayeva, Niyozov, parlament deputati Irina Karamushkina va parlamentning sobiq ikki deputati Ravshan Jeenbekov va Meerbek Miskenbayevni uy qamog‘ida saqlash muddatini 9-aprelga qadar uzaytirilganini ma’lum qilgan edi.
Qirg‘iziston maxsus xizmatlari 2019-yilning 7—8-avgust kunlari mamlakat sobiq prezidenti Almazbek Atambayevni poytaxt Bishkekdan 20 kilometr masofada joylashgan Qo‘ytosh qishlog‘idagi qarorgohida ushlash bo‘yicha operatsiya o‘tkazgan edi. Sobiq davlat rahbarining tarafdorlari va huquq-tartibot organlari o‘rtasidagi ikki kunlik to‘qnashuvlar davomida maxsus xizmatning bir zobiti halok bo‘lgan, 136 kishi tan jarohati olgan edi.
Atambayev 2017-yilgi prezident saylovi yakunlariga ko‘ra, hokimiyatni vorisi va yaqin safdoshi So‘ronbay Jeenbekovga topshirgan edi. Biroq ko‘p o‘tmay sobiq prezident jamoasi a’zolariga nisbatan ketma-ket jinoyat ishlari qo‘zg‘atilgan edi. Atambayev sobiq prezident maqomidan mahrum qilinib, og‘ir va o‘ta og‘ir jinoyatlarni sodir etishda ayblangan edi. Atambayev o‘ziga va safdoshlariga qo‘yilayotgan ayblovlar siyosiy mazmunga egaligini bir necha bor ta’kidlagan edi.
Izoh (0)