«Толибон» ҳаракати билан келишув йўққа чиқиши мумкинлигидан хавотирланаётган АҚШ Афғонистон президенти Ашраф Ғанидан инаугурация маросимини кечиктириб туришни илтимос қилмоқда. Бу ҳақда ўз манбаларига асосланиб, Reuters хабар бермоқда.
Аввалроқ радикал кайфиятдаги «Толибон» ҳаракати Ашраф Ғанининг Афғонистон президенти лавозимига қайта сайланиши мамлакатда кетаётган тинчликка эришиш жараёнига мутлақо зидлигини таъкидлаб, баёнот берган эди. Шунингдек, «Толибон» Афғонистон президенти сайловини ҳам тан олмай, уни кўзбўямачилик деб атаган.
Ашраф Ғани баҳсли президент сайлови якунларига кўра ўтган ҳафта ўзини ғолиб деб эълон қилган ва 27 февраль куни қасамёд қилишни режалаштираётганини маълум қилган эди. Афғонистондаги президент сайлови 28 сентябрь куни бўлиб ўтган эди.
Сайловнинг дастлабки натижаларига кўра, амалдаги президент Ғани 50,64 фоиз, Афғонистондаги ижро ҳокимиятининг ҳозирги раҳбари Абдулло Абдулло эса 39,52 фоиз овоз олган. Афғонистон собиқ бош вазири, «Ҳизби Ислом» партияси етакчиси Гулбиддин Ҳикматёр эса 3,85 фоиз овоз олган.
Сайлов пойгасида иккинчи бўлган Абдулло Абдулло Facebook’даги саҳифасида баёнот қолдириб, сайловнинг дастлабки натижаларига қўшилмаслигини, овозларни қайтадан ҳисоблаб чиқиш лозимлигини таъкидлаган эди.
«Вазиятдан бохабар манбанинг маълум қилишича, ‘Толибон’ билан келишув йўққа чиқишидан хавотирланиб, ўтган ҳафтадан бери Кобулда бўлиб турган АҚШ махсус вакили Залмай Ҳалилзод президент Ғанини келгуси беш йиллик муддат учун режалаштирилган инаугурацияни кечиктиришга кўндирмоқчи», — деб ёзади Reuters.
Аввалроқ АҚШ давлат котиби Майк Помпео АҚШ 29 февраль куни радикал кайфиятдаги «Толибон» ҳаракати билан келишув имзолашга тайёргарлик кўраётганини маълум қилган эди. Афғонистоннинг Tolo News телеканали радикал ҳаракат баёнотига асосланиб, «Толибон» Помпео айтган санада келишув имзоланишини тасдиқлагани ҳақида хабар берган эди.
Изоҳ (0)