Австрияда коронавирус юқтириб олган дастлабки икки киши аниқланди

Австриянинг Тироль федерал штатида коронавирус билан зарарланиш бўйича дастлабки иккита ҳолат қайд этилди. Бу ҳақда «РБК» хабар берди.

Маълум қилинишича, ҳозирда Австриянинг Инсбрук шаҳрида истиқомат қилувчи Ломбардиядан келган 24 ёшли икки нафар италиялик коронавирус билан касалланган. Уларнинг тана ҳарорати кўтарилганидан кейин тиббий ёрдамга мурожаат қилган.

Уларнинг иккаласида ҳам коронавируснинг мавжудлиги иккита текширув натижасида тасдиқланган. Ҳозирги вақтда беморлар Инсбрук клиникаларидан бирида изоляция қилинган. Клиниканинг раҳбари Франц Кацграбернинг айтишича, айни пайтда асосий вазифа касаллар билан алоқада бўлган барча одамларни топиш бўлиб турибди.

Бундан ташқари, Тироль губернатори Гюнтер Платтер коронавирусга гумон қилинган одамлар учун Инсбрукда хусусий клиника очиш ҳақида топшириқ берган.

Австриянинг жанубидаги Тироль федерал ери жанубда Италия билан чегарадош ҳисобланади.

Аввалроқ Италия поездларининг йўловчилари коронавирусга текширилгандан кейингина Австрия чегарасидан ўтишга рухсат берилаётгани ҳақида хабар берилган эди.

Хитой Соғлиқни сақлаш миллий комиссияси мамлакатда ўтган бир сутка давомида COVID-19 коронавируси оқибатида вафот этганлар 71 кишини (уларнинг аксарияти Хубэй провинциясидан) ташкил этиб, жами вафот этганлар сони 2663 кишига етганини маълум қилди. Қайд қилинишича, Хитойда 24 февраль, душанба куни, вирусни юқтириб олиш бўйича 508 та ҳолат аниқланган, 2589 киши даволанишга муваффақ бўлгани айтилмоқда. Бугунга келиб, инфекциядан жами 27 230 киши даволанган, бутун Хитой бўйлаб 641 минг одам текширувлардан ўтказилган бўлиб, касалликка чалинганлар 77 мингдан ортиқ одамни ташкил қилмоқда.