Коронавирус туфайли дунёнинг энг бой одамлари бир кунда 139 млрд доллар йўқотди

Bloomberg Billionaires Index рейтингига кирувчи дунёнинг 500 нафар энг бой кишиси 24 февраль, душанба куни, 139 миллиард доллар йўқотди. Meduza’нинг ёзишича, бунга коронавируснинг жаҳон иқтисодиётига салбий таъсири ҳақидаги янги хавотирлар туфайли фонд бозорларининг пасайиши сабаб бўлган.

Қайд этилишича, бу Bloomberg Billionaires Index томонидан тузиш бошланган рейтингда 2016 йилнинг октябрь ойидан буён дунёдаги энг бой одамлар бойлигининг биринчи марта жиддий пасайишидир.

Улар орасида энг катта зарарни Bloomberg Billionaires Index’да биринчи ўринда турувчи Amazon асосчиси Жефф Безос ва LVMH люкс бренди эгаси Бернар Арно кўрган. Уларнинг иккови ҳам 4,8 миллиард доллардан йўқотган.

24 февраль куни Лондон фонд биржаси индекси FTSE 100 3,3 фоизга, Германиянинг Dax фонд биржаси 4 фоизга, Италиянинг FTSE Mib биржаси 4,5 фоизга, Франциянинг CАC 40 биржаси эса 5 фоизга тушган.

Американинг S&P 500 фонд индекси ва Dow Jones саноат индекси 3 фоиздан ортиқ йўқотган, Гонконгнинг Hang Seng фонд биржаси 1,79 фоизга, Япониянинг Nikkei фонд биржаси эса 0,39 фоизга тушган.

Қайд этилишича, фонд биржалари коронавирус инфекциясининг Хитойдан ташқарига, хусусан, Италия, Жанубий Корея ва Эронга тарқалиши сабабли тушиб кетган.

25 февраль ҳолатига кўра, дунёда коронавирусга чалинганлар сони 80 минг кишидан ошиб кетди, вафот этганлар сони эса 2 700 кишини ташкил қилмоқда.

Аввалроқ миллиардер Уоррен Баффетт коронавируснинг тарқалиши ва унинг жаҳон бозорига таъсири ҳақида фикр билдирган эди.