АҚШнинг аллергия ва юқумли касалликлар миллий институти 2020 йилнинг апрель ойи охирига қадар янги коронавирус вакцинаси бўйича клиник синовларни бошлаш ниятида. «ТАСС»нинг хабар беришича, бу ҳақда ушбу институт директори Энтони Фаучи душанба куни нашр этилган The Wall Street Journal газетасига берган интервьюсида маълум қилган.
Вакцина АҚШнинг Moderna фармацевтика компанияси ва юқоридаги институт билан ҳамкорликда ишлаб чиқилган. Вакцинанинг дастлабки партияси аллақачон Фаучи қўл остидаги ходимларга топширилган.
Синовда дастлаб вирус юқтирмаган 20 нафардан 25 нафаргача кўнгиллилар иштирок этади. Шифокорлар унинг самарадорлиги ва одамлар учун хавфсизлигини аниқлаши зарур. Натижаларни июль ёки август ойларида олиш мумкин.
Фаучининг таъкидлашича, вакцина жуда тез ишлаб чиқилган. Унинг сўзларига кўра, биринчи синовлар муваффақиятли якунланган тақдирда ҳам, препарат келгуси йилда кенг тарқалиши мумкин.
«Вакцинадан фойдаланиш — инфекция тарқалишини бутунлай бостиришнинг ягона йўли», — дея қўшимча қилган у.
Эслатиб ўтамиз, коронавирус 2019 йил декабрь охирларида Хитойнинг Хубэй провинцияси Ухань шаҳрида тарқала бошлаган. Коронавирус Хитойнинг материкли қисмидан ташқарида жами 28 мамлакатда кузатилган: АҚШ, Россия, Италия, Франция, Исроил, Эрон, Миср, Испания, Тайвань, Япония ва бошқалар. 24 февраль ҳолатига кўра, бутун дунёда жами 78 мингдан ортиқ одам коронавирусга чалинган, уларнинг 2,6 минг нафардан кўпроғи ушбу касалликдан вафот этган.
Изоҳ (0)