Ўзбекистонда тўй ўтказилаётган вақтда қудалар орасидаги олди-берди масаласи айрим оилалар учун мажбурият бўлиб қолган. Мабодо бу мажбурият бажарилмаса, икки томондан бири қайсидир жиҳатдан камситилиш ҳолатлари кузатилмоқда. Бу ҳақда 18 февраль куни АОКАда «Тўй-маросимларни тартибга солиш тўғрисидаги қарорнинг жойларда ижросини ташкил этилиши масалалари» мавзусида ўтказилган матбуот анжуманида таъкидлаб ўтилди, дея хабар берди «Дарё» мухбири Миролим Исажонов.
Тадбирда Сенатнинг Ёшлар, маданият ва спорт масалалари қўмитаси раиси ўринбосари Дилором Тошмуҳаммедова тўй ва маросимлар борасида ўз фикр-мулоҳазаларини билдирди. Бир ярим йил давомида ҳукумат ҳузуридаги «Оила» илмий-амалий тадқиқот марказини бошқарган собиқ директор аҳоли ўртасида олиб борилган тадқиқот натижалари ҳақида баъзи маълумотларга тўхталиб ўтди.
«2018 йилда тўй ва маъракаларни дабдабали ўтказилётгани юзасидан фуқароларимиздан Сенатга эътирозлар келиб тушди. Шундан сўнг Сенат кенг жамоатчилик муҳокамаларини ўтказди. ‘Оила’ марказида фаолият юритаётган пайтимда, биз ҳам ҳудудларда жамоатчилик муҳокамаларини йўлга қўйганмиз. Хусусан, Наманган вилоятининг Тўрақўрғон туманида бир қатор оила ва ёшлар билан учрашдик. Уларнинг дабдабали тўйлар юзасидан фикрларини билишга қизиқдик.
Марказ тадқиқотлари натижасига кўра, бизнинг фуқароларда ҳамон орзу-ҳавас тушунчаси қандайдир баҳонага айланиб қолган. Айниқса, аёлларимиз ичида орзу-ҳавасга интилиш, у ёки бу жараённи кўз-кўз қилиш ва ўз оиласи ижтимоий мақомини шу билан кўтариш афсуски ҳануз учрамоқда.
Сўровномаларда маълум бўлишича, тўй пайтидаги олди-берди масаласи баъзи оилаларда мажбурият бўлиб қолган. Агарда бу мажбурият бажарилмаса, икки томондан бири қайсидир жиҳатдан камситиляпти. Сарпо масаласи ҳам ҳамон долзарб. Тўйга маблағ йиғиб келиш учун фуқароларимиз бир неча йилга мигрант сифатида хорижга кетаётганлиги ҳам ранжитадиган факт.
Тадқиқот мобайнида аҳоли фикрларини сўраганмизда, улар тўй учун йиғилган пулларни унумли сарфлаш, кўп тардбирларни тартибга солиш кераклиги ва бу борада маҳалла вакиллари бош-қош бўлиши лозимлигини таъкидлади. Ёшлар турли маросимларни ҳашаматли тарзда эмас, балки ихчам, камхарж кўринишда оила даврасида нишонлаш, тўйни бир кунда ўтказиш каби таклифларни билдиришди. Тадқиқот натижаларини Сенатга тақдим этганмиз ва у ерда ҳам жамоатчилик фикрлари эшитилиб, ўтган йили сентябрда Қонунчилик палатаси ва Сенатнинг қўшма қарори қабул қилинди», — деди Дилором Тошмуҳаммедова.
Эслатиб ўтамиз, 2019 йилнинг сентябрида Олий Мажлис Сенати Кенгаши ҳамда Олий Мажлис Қонунчилик палатаси Кенгашининг қўшма мажлисида тўй-ҳашамлар, оилавий тантаналар, маърака ва маросимлар борасида сўз юритилганди. Октябрда эса Олий Мажлис Сенати тўйлар, оилавий тантаналар, маърака ва маросимлар ўтказилишини тартибга солиш тўғрисидаги низомни эълон қилганди.
2020 йил 1 январдан бошлаб, тўй-ҳашамларни тартибга солиш ҳақидаги Сенат ва Қонунчилик палатасининг қўшма қарори (юридик жиҳатдан кучи қонунга тенг) кучга кирди.
Маъмурий жавобгарлик тўғрисидаги кодексга тўйларни ўтказиш тартибини бузганлик учун жавобгарлик киритилиши кутилмоқда.
Ўзбекистон маданият вазири ўринбосари Камола Оқилова тўйларни намунавий ўтказиш бўйича сценарийлар ишлаб чиқишни таклиф қилган эди. Кейинроқ ўша вақтдаги маданият вазири Бахтиёр Сайфуллаев ўз ўринбосарининг фикрини нотўғри деб баҳолаб, тўйларни бир хил сценарий асосида ўтказиб бўлмаслигини айтган. Собиқ сенатор Иқбол Мирзо эса дабдабали тўй қилаётганларни халқ олдида шарманда қилиш кераклигини таъкидлаган эди.
Изоҳ (0)