18 февраль куни Олий Мажлис Қонунчилик палатасининг навбатдаги ялпи мажлисида 15 та масала кўриб чиқилди. Унда парламент аъзолари томонидан «Ўзбекистон Республикаси фуқаролиги тўғрисида»ги қонун лойиҳаси қизғин муҳокама этилди ва қабул қилинди.
«Дарё» мухбири Миролим Исажоновнинг хабар беришича, мазкур қонуннинг 24-моддасида Ўзбекистон Республикаси фуқаролигига қабул қилишда давлат тилини минимал — мулоқот қилиш даражасида билиш талаби қўйилган. Ушбу модда энг кўп ва кенг муҳокамага сабаб бўлди.
«Фуқаролик беришда тил ҳақида қўйилган талабни тўғри, деб ҳисоблайман. Ўзбекистонда давлат тили — ўзбек тили. Республикада ўз ҳуқуқлари ҳимоя қилиниши учун, фуқаро давлат тилида мулоқот қила олиш учун тилни минимал даражада билиши зарур. Ҳар қанақа этник келиб чиқишдан қатъи назар, бу талаб тўғри.
Вазирлар Маҳкамаси ҳузурида Давлат тилини ривожлантириш департаменти мавжуд. Давлат тилини билиш даражасини аниқлаш тартибини ваколати даражасида мазкур ташкилот кўриб чиқиши энг мақбул йўл», деди спикер ўринбосари Алишер Қодиров.
Муҳокамалар мобайнида Ички ишлар вазири ўринбосари Азиз Икромов ҳам ўз фикр-мулоҳазаларини билдираркан, хусусан шундай деди: «Ўзбекистонда яшаётган фуқаролиги йўқ шахсларнинг асосий қисмини ўзбеклар ташкил қилади. Шу боис ҳам тил билан боғлиқ талаб уларга муаммо туғдирмайди».
Таҳлилларга кўра, мамлакатдаги фуқаролиги йўқ шахсларнинг умумий сони 95 минг нафардан зиёд. Уларнинг 50 минг нафарга яқини Президент Шавкат Мирзиёевнинг Олий Мажлисга мурожаатидан сўнг автоматик тарзда Ўзбекистон фуқаролигига ўтиши кутилмоқда.
Азиз Икромовнинг маълум қилишича, қолган 45 минг кишининг 80 фоизи ўзбек, 4 минг нафари рус, минг нафарга яқини корейс миллатига мансуб шахслардир.Тадбирда таъкидланишича, мазкур ҳужжат амалга киритилса, қатор қулайликлар яратилади. Жумладан, фуқароликни олиш учун тақдим қилинадиган ҳужжатлар сони қисқаради, ортиқча оворагарчилик ва қоғозбозликка қисман чек қўйилади. Ўзбекистон фуқаролигига қабул қилиш тартиб-таомиллари эркинлаштирилади. Фуқароларнинг консуллик ҳисобига туриш муддати узайтирилади.
Муҳокама якунида қонун қабул қилинди ва Сенатга юбориладиган бўлди.
Статистик маълумотларга кўра, 1991 йил сентябридан ҳозиргача 8 минг 249 нафар фуқаролиги бўлмаган шахс Ўзбекистон фуқаролигига қабул қилинган. Уларнинг асосий қисми — 7 минг 765 нафари (94 фоизи) 2016 йил декабрь ойидан 2019 йил июль ойига қадар Ўзбекистон фуқаролигига қабул қилинган.
Эслатиб ўтамиз, амалдаги қонуннинг 6-моддасида 1995 йил 1 январга қадар Ўзбекистонга кириб келган ва доимий пропискага ўтган, хорижий давлат фуқаролигини қабул қилмаган ҳамда бу қонун кучга кирган кунга қадар Ўзбекистонда яшаш гувоҳномаси асосида истиқомат қилган шахс истак билдирган тақдирда Ўзбекистон Республикасининг фуқароси, деб тан олиниши назарда тутилган.
Изоҳ (0)