Суд 2018 йилнинг ёзида Тошкент шаҳридаги Aurum-898 тунги клубида ўлдирилган Жамшид Кенжаевнинг оиласига айбланувчилардан жами 300 млн сўм маънавий зарар ундириш тўғрисида ҳукм чиқарди.
Фуқаролик ишлари бўйича Мирзо Улуғбек туманлараро судида Aurum-898 тунги клубида ўлдирилган спортчи Жамшид Кенжаевнинг турмуш ўртоғи Олися Мирзомуродованинг боқувчисини йўқотгани сабабли етказилган зарар, моддий ва маънавий зарар ундириш ҳақидаги даъво аризаси бўйича иш кўриб чиқилди.
Суднинг 2020 йил 17 январдаги ҳал қилув қарорига кўра, жавобгар Шодали Қиличовдан даъвогар Олеся Мирзомурадова ва Ёқубжон Кенжаев (марҳумнинг отаси) фойдасига жиноят натижасида етказилган маънавий зарар учун 250 миллион сўм миқдорида компенсация ундирилиши белгиланган.
Шунингдек, жавобгарлар Алижон Ҳамраев, Жаҳонгир Ёрқулов ва Саидазим Камолидиновдан солидар тартибда марҳумнинг яқинлари фойдасига жиноят натижасида етказилган маънавий зарар учун 50 миллион сўм компенсация ундирилиши белгиланган.
Бундан ташқари, ҳал қилув қарорига мувофиқ, жавобгар Шодали Қиличовдан даъвогар Олеся Мирзомурадова фойдасига боқувчисини йўқотганлиги сабабли етказилган зарарни қоплаш учун 2018 йил 27 февралда туғилган Аиша исмли фарзандининг 18 ёшга тўлгунига қадар ҳар ойда базавий ҳисоблаш миқдорининг 5 баробарининг 1/3 қисми (тахминан 372 минг сўм) миқдорида зарар ундириб борилади.
Ишни кўриб чиққан судья Олимжон Шамсиевнинг маълум қилишича, ҳал қилув қарори жорий йилнинг 7 февраль куни кучга кирган ва ундирувни таъминлаш учун ижро варақалари чиқарилиб, Мажбурий ижро бюросининг тегишли бўлимларига юборилган.
Эслатиб ўтамиз, 2018 йилнинг 8 дан 9 августига ўтар кечаси, чамаси соат 00:25 ларда Юнусобод туманидаги Aurum-898 тунги клуби олдида жанжал оқибатида эркин кураш бўйича халқаро тоифадаги спорт устаси 25 ёшли Жамшид Кенжаев пичоқбозлик оқибатида вафот этган.
Мавзуга доир:
- Спортчи Жамшид Кенжаевнинг ўлимига тунги клубга ўзи олиб келган пичоқ сабаб бўлган
- Тошкентдаги Аурум 898 тунги клубидаги муштлашув видеоси пайдо бўлди (видео)
- Тошкентда «Аурум 898» тунги клубида ўлдирилган спортчи Жамшид Кенжаев иши бўйича суд бошланди
- Жамшид Кенжаевни ўлдирганликда гумонланаётган Шодали Қиличов: Уни ўлдиришни хоҳламагандик
- «Марҳум қийналиб ўлган». Тиббий эксперт Жамшид Кенжаев иши бўйича судда нималар деди?
Кейинчалик Жамшид Кенжаев ўлдирилган тунда унинг ёнида бўлган ўртоқларидан бири Ш.Т.га етказилган жароҳатлар юзасида суд мажлиси бўлиб ўтган. Судланувчи сифатида қатнашган Aurum-898 тунги клубининг қўриқчиси М.А.га нисбатан суд ҳукми ўқилиб, у жиноят кодексининг 277-моддаси (Безорилик) 3-қисми «г» банди билан айбли деб топилган ва унга 5 йил муддатга озодликни чеклаш жазоси тайинланганди.
Изоҳ (0)