Блогер Отабек Нуритдинов Андижон шаҳрининг Асака туманидаги «Холид ибн Валид» жоме масжиди яқинида спиртли ичимликлар дўкони очилгани ҳақида 18 февраль куни пост жойлаганидан сўнг дўкон эгалари томонидан калтаклангани ҳақида хабар берилганди. Андижон вилояти ИИБ ушбу ҳолат юзасидан расмий маълумот берди.
Ҳолат юзасидан Асака тумани ИИБ томонидан олиб борилган дастлабки суриштирув давомида Отабек Нуритдинов мурожаатида келтирган спиртли ичимликлар билан савдо қилувчи дўкон Асака шаҳри Абдураҳмон Жомий кўчасида яшовчи «Халилилло қувончи» номли хусусий корхонага қарашли бўлиб чиққан. Дўкон фуқаро Ю.Д.га тегишли. У 18 февраль куни фарзандлари А.Х. ва А.А. билан биргаликда Нуритдиновнинг фарзанди даволанаётган Тўрттош кўчасидаги шифохонага борган. Отабек ва унинг онаси Матлубахон билан суҳбатлашаётган вақтида Ю.Д.нинг ўғли А.А. Отабекнинг юз қисмига уриб, тан жароҳати етказганлиги маълум бўлган.
Шунингдек, суриштирув давомида аниқланишича, Отабек Нуритдинов юқорида тилга олинган дўкон ҳақидаги суратни ижтимоий тармоқлар орқали кўрган, саҳифасига жойлаган ва муносабат билдирган. Натижада Ю.Д. фарзандлари билан унинг яшаш манзилига келган ва улар ички ишлар органлари ходимларини рўкач қилиб, уни қўрқитмоқчи бўлишгани аниқланган. Нуритдинов ҳозирда бунга ички ишлар органлари аниқлик киритаётганлигини ва ички ишлар органларининг ушбу ҳолатга алоқаси йўқлигини маълум қилган.
Ҳолат бўйича айни вақтда Асака тумани ИИБ томонидан терговолди суриштирув ҳаракатлари олиб борилмоқда.
Эслатиб ўтамиз, Отабек Нуритдинов тахаллуси остидаги андижонлик блогер Абдуфатто Нуритдинов шу йилнинг январь ойида туҳмат ва ҳақоратда айбланиб, 15 суткага қамалиб чиққанди. Блогер ўз постларида асосан Асака шаҳридаги мансабдорлар фаолиятидаги эҳтимолий коррупцион фактлар, бюджет маблағларини ўғирлаш ва талон-торож қилиш ҳолатлари ҳақида ёзган.
Изоҳ (0)