Олий Мажлис Сенати раиси Танзила Норбоева халқ депутатлари Жиззах вилояти Кенгаши депутатлари билан учрашди. Бу ҳақда Сенат ахборот хизмати хабар берди.
Парламент юқори палатаси раиси ўз чиқишида маҳаллий кенгашлар олдида Президентнинг Олий Мажлисга йўллаган Мурожаатномасидан келиб чиқадиган долзарб вазифаларга тўхталди. Вилоят, туман, шаҳар Кенгашлари фаолиятини жонлантириш вақти келганлигига алоҳида урғу берди.
Учрашувда қайд этилганидек, сайловчиларнинг ишончини оқлашда, Мурожаатномада белгилаб берилган вазифаларни амалга оширишда барча даражадаги депутатлардан катта масъулият талаб этилади. Энди халқ депутатлари кенгашлари ҳам, уларнинг доимий комиссиялари ҳам ўз иш услубларини тубдан ўзгартириши лозим.
Яқин ва узоқ истиқболдаги вазифалар ижросини таъминлаш, халқ фаровонлигини юксалтириш, сайловчилар томонидан сайловолди учрашувларида кўтарилган муаммоларни ҳал этиш билан изчил шуғулланиш улар иш фаолиятининг бош мезонига айланиши зарур.
Танзила Норбоева энди ҳар ойда маҳаллий кенгашларда давлат органи раҳбарларининг аҳоли мурожаатлари билан ишлаш, қонун, фармон ва қарорларда белгиланган вазифаларни ижро этиш юзасидан масъул идора ва ташкилотларнинг ахборотлари эшитилиб, фаолияти қониқарсиз деб топилган раҳбарларга тегишли чоралар кўриш амалиёти жорий этилиши зарурлигини таъкидлади.
Президент томонидан Кенгаш сўрови институтини жорий этиш таклифи киритилгани ва бу бўйича ҳам қонунчиликка ўзгартириш киритиш юзасидан ишлар бошлангани ҳақида сўз юритилди.
Изоҳ (0)