Пайғамбарликка даъво қилган бухоролик аёлга бир йил озодликни чеклаш жазоси тайинланди. Бу ҳақда «Дарё»га Вобкент туман суди раиси вазифасини бажарувчи Нозимжон Жўраев хабар берди.
Маълум бўлишича, Бухоро вилояти Шофиркон тумани Жўйнав қишлоғида яшовчи Д.Й. 2019 йилнинг декабрида ўзини пайғамбар деб эълон қилган. Аввалига ўз исмини ошкор этмаган аёл атрофидагиларга ўзига ваҳий келаётгани ва ғайб хабарлари асосида «Туҳфа» номли китоб нозил бўлганлигини билдириб, даъватлар қилиб, ёлғон хабарлар тарқатиб келган.
Сохта даъво билан чиққан бу аёл «Туҳфа» китобида Муҳаммад (с.а.в.) охирги пайғамбар экани ва Қуръони карим илоҳий китоб эканини рад этган. У «Туҳфа»нинг ўзига Аллоҳдан келган китоб эканлиги, ушбу китоб орқали Худони танишини ва инсон руҳиятини даволашга хизмат қила олишини айтган.
Хонадонида олиб борилган қидирув-тинтув ҳаракатлари давомида «Туҳфа» номли китобидан кўчирилган 27 дона дафтар, 3 дона файл папка, 1 дона флешкартани тарқатиш мақсадида сақлаб келаётганлиги аниқланган.
Аёл Бухоро давлат университетини битирган қизи Д.У., опаси Д.Й., шунингдек, яна 4 нафар аёлни китобни қўлёзма шаклида кўчириб олишга жалб этган. Бу билан у ақидапарастлик билан йўғрилган маълумотларни тарқатиб, жамоат хавфсизлиги ва жамоат тартибига таҳдид соладиган материалларни тайёрлаш ва тарқатиш жиноятини содир этган.
Бундан ташқари, кўплаб фуқароларни касаллигидан фориғ этгани учун улар томонидан ўзининг «Пайғамбар» деб тан олингани хусусидаги кўрсатмалари ёлғон ва асоссиз эканлиги фош этилган.
Маълум қилинишича, жамоат хавфсизлиги ва тартибига таҳдид соладиган материаллар тайёрлаш ва тарқатиш жиноятини содир этишда айбланган Д.Й. Жиноят кодекси 244-1-моддасининг 2-қисмида кўрсатилган жиноятларни содир қилганликда айбли деб топилган. Унга 1 йил озодликни чеклаш жазоси тайинланган.
Изоҳ (0)