Бавария Соғлиқни сақлаш вазирлиги хабарига кўра, Германияда коронавирус юқтирганлар сони 16 кишига етди, деб ёзмоқда «РБК».
Икки янги касалланиш ҳолати Мюнхен яқинидаги Старнберг ҳудудида аниқланган. Улар Германиядаги аввалги касалланиш ҳолатлари билан боғлиқ бўлган Webasto компанияси ходимлари эканлиги маълум бўлди.
Германияда коронавирус билан касалланиш ҳолати биринчи марта 28 январь куни қайд этилган. 2 февралга келиб 8 киши, шу жумладан, Webasto’нинг касал ишчиларидан бирининг боласи коронавирус юқтиришга улгурган.
11 февраль ҳолатига кўра, Хитойда ЖССТ қарорига мувофиқ вирус COVID-19 номини олган коронавирус оқибатида вафот этганлар сони 1110 кишидан ошиб кетди. Россияда 20 минг нафар одам коронавирус туфайли назоратга олинган, АҚШда коронавирусга чалинган одамлар сони 13 нафарни ташкил қилмоқда. Японияда коронавирус билан касалланган 161-бемор қайд этилди. Вьетнамда эса коронавирусни юқтирганлар сони 15 нафарга етди — улар орасида уч ойлик чақалоқ ҳам бор.
ОАВларда Туркманистонда коронавирусдан бир киши вафот этгани, аммо марҳум ҳақидаги маълумотлар қатъий сир сақланаётгани маълум қилинган.
Хитой шифокорлари янги коронавирусни текшириш пайтида нотўғри салбий натижалар жуда кўп бўлиши мумкинлигини таъкидламоқда. Яъни тест организмда вирус йўқлигини кўрсаца ҳам аслида вирус мавжуд бўлиши мумкин.
Изоҳ (0)