Юзлаб компаниялар, хусусан Xiaomi ва DiDi банклардан жами 8,2 млрд АҚШ доллари миқдорида қарз сўрамоқда. Компанияларнинг айримлари эпидемияга қарши курашга жалб этилган, муайян қисми коронавирус тарқалиши оқибатида жиддий зиён кўрган.
Юзлаб Хитой компаниялари коронавирус оқибатларини бартараф қилиш мақсадида банкларга жами 8,2 млрд АҚШ доллари миқдорида кредит беришни сўраб мурожаат қилган, деб ёзмоқда «РБК».
Reuters манбалари берган хабарга кўра, компаниялар орасида смартфонлар ишлаб чиқарувчи Xiaomi ва Хитойда озиқ-овқат етказиб берувчи энг катта Meituan Dianping компанияси , транспорт хизматларини кўрсатувчи DiDi, технологик Megvii, шунингдек, антивирус дастурлар ва мобил иловалар ишлаб чиқарувчи Qihoo 360 бор.
Ушбу компаниялар коронавирусга қарши курашга фаол тарзда жалб этилган ёки касаллик туфайли жиддий зарар кўрган бўлиши мумкин. Манбаларга кўра, кредит сўраб мурожаат қилган ташкилотлар қисқа вақт ичида банклардан ижобий жавоб олиши кутилмоқда. Бундан ташқари кредитлар имтиёзли ставкалар асосида берилади.
«Кредит борасидаги сўнгги сўз банклар томонидан айтилади. Ставкалар фоизи банклар ўз етакчи мижозларига таклиф қиладиган миқдор билан бир хил бўлади», — деган Reuters манбаси.
Ҳозирча компаниялар эпидемияни енгил ўтиш учун оладиган кредитлар ҳажми қанча бўлиши ҳақида маълумотлар йўқ. Шунга қарамай, улар банклардан сўраётган пулларнинг қанча экани манбалар берган рўйхатларда акс этган.
Масалан, Xiaomi тиббиёт ускуналари ва аксессуарлари, жумладан ниқоблар ҳамда термометрлар ишлаб чиқариш учун 5 млрд юань (716 млн доллардан кўпроқ) кредит сўрамоқда. Meituan Dianping 4 млрд юань (572,9 млн доллар) маблағ олмоқчи. Ушбу пулларнинг бир қисми Ухандаги тиббиёт ходимларига овқат етказиб беришга сарфланади.
DiDi коронавирусдан жиддий зарар кўрган ва 50 млн юань (7,16 млн доллар), Qihoo тиббиётга мўлжалланган маҳсулотлар, вирусни локализация қилиш ва кузатиш имконини берадиган мобил иловалалар ишлаб чиқиш учун 360 миллиондан 1 миллиард юангача (тахминан 143,25 млн доллар) кредит олмоқчи. Megvii ҳам касалликка қарши кураш технологияларини ишлаб чиқади, улардан бири «оломон ичида тиббий ниқоб таққан одамларни аниқлаш» имконини беради.
Коронавирусга қарши биринчи вакцина бир ярим йилдан кейин ишлаб чиқилиши мумкин, дея таъкидлаган Жаҳон соғлиқни сақлаш ташкилоти раҳбари Тедрос Гебрейесус. Унинг нутқи матни ташкилот расмий сайтига жойлаштирилган.Гебрейесус вакцина ва дорилар ишлаб чиқилиши янги вирусни тадқиқ қилиш дастурининг бир қисми бўлади.
«Уларни ишлаб чиқиш муайян вақт талаб қилади, лекин бу биз ҳимоясиз эканимизни англатмайди», — деган ЖССТ раҳбари.
Унинг сўзларига кўра, бугун коронавирус тарқалишининг олдини олиш бўйича кўплаб чора-тадбирлар амалга оширилган.
ЖССТ коронавирусга COVID-19 деб расмий ном берган, касалликка чалинган беморлар сони 11 февраль ҳолатига кўра, Хитойда 42 708 нафарга етган, қолган 24 мамлакатда вирусга чалиниш бўйича 393 та ҳолат қайд этилган. Вирус туфайли 1018 нафар одам ҳаётдан кўз юмган.
Изоҳ (0)