Экспертлар Хитойда тарқалган коронавирусга қарши биринчи вакцина 18 ойдан кейин пайдо бўлиши мумкинлигини маълум қилди. Бу ҳақда Женевада ўтган конференцияда ЖССТ раҳбари Тедрос Адан Гебрейесус маълум қилган. Ушбу маълумот ташкилотнинг Twitter’даги саҳифасида ҳам акс этган.
Гебрейесуснинг сўзларига кўра, вакцина ишлаб чиқилишига узоқ вақт кетишини ҳисобга олган ҳолда ҳозирнинг ўзида коронавирус келтириб чиқарадиган COVID-19 номли касалликни олдини олишга қаратилган чора-тадбирларни амалга оширишга мавжуд ресурсларни сафарбар этиш лозим. ЖССТ бу борада ўз тавсияларини берган, масалан, 40–60 сония оралиғида қўлларни тез-тез совунлаб ювиш, акса урган вақтда оғиз ва бурунни кафт билан беркитиш, тумов аломатлари кўп учрайдиган гавжум жойларга бормаслик, шунингдек касалликка чалинган беморлар билан мулоқот қилмаслик шулар жумласидан.
https://twitter.com/WHO/status/1227246758196998145
Коронавирус Ухань шаҳрида 2019 йил декабрида тарқала бошлаган. Айни вақтда касалликка чалиниш ҳолатлари ХХРдан ташқари дунёнинг 20 дан ортиқ мамлакатида кузатилган. ЖССТ коронавирус тарқалишини халқаро даражадаги фавқулодда ҳолат деб тан олган.
2020 йил 11 февраль ҳолатига кўра, Хитойда коронавирус оқибатида вафот этганлар сони 1016 кишидан ошиб кетган, мамлакат ҳудудида 42 638 кишида касаллик ҳолати қайд этилган. 37 726 киши ҳозирда даволанишда бўлиб, улардан 7333 нафарининг аҳволи оғир. Жами 3996 киши касалликдан даволаниб, тиббиёт муассасасидан уйига жавоб бериб юборилган.
Изоҳ (0)