Хитой Соғлиқни сақлаш миллий комиссияси мамлакат ҳудудида 44 653 кишида касаллик ҳолати қайд этилгани ҳақида маълум қилди. Инфекция сабаб вафот этганлар сони минг кишидан ошиб кетди. Короновирус ҳақида 12 февралнинг муҳим хабарлари «Дарё» оқшоми дайжестида.
Касалланганлар ва вафот этганлар
Хитой Соғлиқни сақлаш давлат комиссияси мамлакатда COVID-19 коронавируси оқибатида вафот этганлар сони 1113 кишига етгани ҳақида хабар берди. Хитой бўйлаб вирусни юқтириб олганлар сони 44 653 кишини ташкил этмоқда, шу кунга қадар уларнинг 4740 нафари даволанган, 8204 одам оғир аҳволда, касаллар билан алоқда бўлган яна 185 минг киши назорат остига олинган.
Маълум қилинишича, Хитойда сўнгги сутка давомида 2015 кишида коронавирус аниқланган — бу 30 январдан буён энг паст кўрсаткич. Вафот этганларнинг аксарияти Хубэй провинциясидан.
Япония соғлиқни сақлаш, меҳнат ва фаровонлик вазири Кацунобу Като мамлакат қирғоғида карантинда турган Diamond Princess саёҳат кемасида коронавирусга чалинган йўловчилар сони 39 кишига ошиб, 174 нафарга етганини маълум қилди. Шунингдек, карантинни кузатишга масъул бўлган офицерлардан бири ҳам касалликка чалингани айтилмоқда.
Бавария Соғлиқни сақлаш вазирлиги хабарига кўра, Германияда коронавирус юқтирганлар сони 16 кишига етди. Германияда коронавирус билан касалланиш ҳолати биринчи марта 28 январь куни қайд этилган. 2 февралга келиб эса 8 кишини ташкил этган.
Жаҳон соғлиқни сақлаш ташкилотининг маълумотига кўра, коронавирус билан 40,5 минг одам касалланган. Ташкилот раҳбари Тедрос Адан Гебрейесуснинг маълум қилишича, COVID-19 га қарши илк вакциналар ярим йилдан сўнг тайёр бўлиши мумкин. Шу билан бирга Гебрейесуснинг айтишича, бугунги кунда касалликнинг олдини олишнинг кўплаб усуллари мавжуд.
Ўзбекистондаги вазият
Ўзбекистон Соғлиқни сақлаш вазирлиги Туркманистонда коронавирусдан бир киши вафот этганлиги ҳақидаги хабарларга изоҳ бериб, вазирлик Туркманистонда коронавирус қайд этилгани ҳақида маълумот келиб тушмаганини маълум қилди. «Улар билан маълумотлар алмашиш йўлга қўйилган ва бу ахборот алмашинувини давом эттирамиз», — деган соғлиқни сақлаш вазирининг биринчи ўринбосари Баҳодир Юсупалиев «Дарё» мухбири Мусулмонбек Иброҳимовга.
Ўзбекистон 12 февраль, чоршанба куни, Хитойга энг зарурий тиббий анжомлар, хусусан, Хитойда айни пайтда талаб этилаётган бир марта қўлланадиган стерил қўлқоплар, ҳимояловчи устки кийим, ниқоб ва бошқалар мавжуд бўлган гуманитар юк юборди. «Хитой қудратли давлат, улар кўп амалий ишларга қўл урган, саъй-ҳаракатлар қилинмоқда. Бу давлатнинг қудрати ва имкониятларини инобатга олган ҳолда, улар синовни енгиб ўтишига ишонамиз. Ўзбекистон дўст ва ҳамкор сифатида ХХРга ҳар томонлама ёрдам кўрсатади. Бу ҳам маънан, ҳам амалий ёрдам бўлади. Бунинг исботи ўлароқ, Президентимиз томонидан Хитойга гуманитар ёрдам юбориш бўйича фармойиш имзоланди», — деди ташқи ишлар вазири ўринбосари Дилшод Аҳатов.
Ички ишлар вазирлиги расмий сайтида коронавирус Ўзбекистонга ҳам етиб келгани ҳақида ваҳима уйғотадиган «Коронавирусга чалинган бемор изоляция қилинди» номи остида хабар чиқди. Ушбу хабар ИИВнинг Telegram’даги саҳифасида ҳам шу сарлавҳа остида чиқди.
Мавзуга доир: ИИВ Хоразмда коронавирусга чалинган бемор изоляция қилингани ҳақида хабар тарқатди. Аслида бу ўқув машғулоти эди
Тошкент шаҳар Учтепа тумани ҳокимлиги хабар беришича, туманда жойлашган «Фарҳод» ва «Ўрикзор» бозорларида коронавирусга қарши дезинфекция ўтказилган. Ҳокимият қўшимча сифатида тумандаги ҳар бир тиббий муассасада захира хоналари ҳамда дори воситалари тайёрланганини маълум қилган.
Жаҳондаги вазият
Жаҳон соғлиқни сақлаш ташкилоти (ЖССТ) аввал 2019-nCoV деб эътироф қилинган коронавирус инфекциясига янги ном берди. Ташкилот қарорига мувофиқ, инфекция COVID-19 номини олган, бу Corona Virus Disease жумласининг қисқартмаси («коронавирус келтириб чиқарадиган касаллик») ва мос равишда вирус тарқалган йил (2019).Хитойдаги юзлаб компаниялар банклардан жами 8,2 миллиард АҚШ доллари миқдорида қарз сўрамоқда. Компанияларнинг айримлари эпидемияга қарши курашга жалб этилган, муайян қисми коронавирус тарқалиши оқибатида жиддий зиён кўрган. Қарз сўраган компаниялар орасида смартфонлар ишлаб чиқарувчи Xiaomi ҳам бор.
Хитойлик шифокорлар янги коронавирусни аниқлаш бўйича ҳар икки синов ҳам нотўғри натижа бериши мумкин, шунинг учун, касаллик билан боғлиқ ҳақиқий ҳолатлар сони камида икки баравар кўп бўлиши мумкинлигини маълум қилди. Бунга сабаб эса янги коронавирусни текшириш пайтида нотўғри натижалар жуда кўп бўлганлигини таъкидланмоқда.
Уханда коронавирус билан касалланганларни даволаш учун қурилган вақтинчалик касалхоналардан бирида ҳамширалар беморларни хурсанд қилиш мақсадида оммавий рақс ташкиллаштирди. Воқеа акс этган видео ижтимоий тармоқларда яшин тезлигида тарқалиб, фойдаланувчиларда ижобий таассурот қолдиргани айтилмоқда.
Россиянинг Санкт-Петербург шаҳрида яшовчи Алла исмли аёл Хитойдан қайтганидан сўнг 14 кунлик коронавирус карантинга жойлаштирилган касалхонадан қочиб кетди. 32 ёшли аёл 7 февраль, жума куни, касалхонадаги карантин изоляторидан қочиб кетган. Аммо бу ҳақда энди маълум бўлган. Яна бир шунга ўхшаш воқеа Самара шаҳрида юз берган. Гузел Недер исмли аёл боласи билан каратин учун жойлаштирилган касалхонадан қочиб кетганини маълум қилган. Аёл кўрсатма бериш учун полицияга чақирилган.
Италиянинг Рим шаҳрида полиция кўчада бир гуруҳ хитойликларни таъқиб қилиб, уларни коронавирус тарқатишда айблаган ўсмирлардан бирини қўлга олди. Ўсмирлар хитойликларга қарата «Коронавирусни бу ерга сизлар олиб келдингиз, йўқолинглар бу ердан!», — деб бақирган. Аввалроқ Римда коронавирусни юқтириш ҳолати қайд этилгани ҳақида хабар берилган эди.
Ҳар куни кечқурун фақат битта хабар жўнатамиз. «Дарё» оқшоми — кун давомида рўй берган барча воқеа-ҳодисалар дайжести Telegram-канали: @daryooqshomi
Изоҳ (0)