Соғлиқни сақлаш вазирлиги ҳузуридаги Санитария-эпидемиологик осойишталик агентлигининг «Дарё»га маълум қилишича, коронавирус касаллиги 6 февраль кунигача дунёдаги 24 та давлатда 191 нафар фуқарода лаборатория усулида тасдиқланган.
Хитойда жами 28 060 нафардан ортиқ фуқаро касалланиб, кунлик ўсиш 15,2 фоизни (3667 нафар) ташкил этмоқда. 564 (2 фоиз) нафар фуқаро ушбу касалликдан вафот этган.
5 февраль куни агентликнинг вирусология лабораториясига Хитойдан келган 245 нафар фуқародан коронавирус инфекцияси таҳлили учун намуналар келтирилиб, ушбу намуналарда коронавирус инфекцияси топилмаган.
Ислом Каримов номидаги Тошкент халқаро аэропортига жорий йилнинг 5 февраль куни хорижий давлатлардан 28 та самолёт қабул қилинди, 3990 нафар фуқаро санитария-карантин пунктларида термометриядан ўтказилган.
Темир йўллари АЖ марказий Санитария-эпидемиология хизматига қарашли 6 та санитария-карантин пунктидан жами 663 нафар фуқаро ўтган, шулардан 40 нафарини хориж фуқаролари ташкил этади. Тана ҳарорати кўтарилган беморлар аниқланмаган.
Давлат чегара кесишиш пунктларидаги санитария-карантин пунктлари орқали 1585 та автотранспортлар, 28 644 нафар фуқаро ўтказилган, шулардан 14 646 нафари чет эл фуқароси ҳисобланади.
«Ички ишлар вазирлиги томонидан тақдим этилган Хитойдан келган фуқаролар рўйхати асосида 2912 нафар фуқаро тиббий кўрикдан ўтказилди. Шулардан 2188 нафарида касалликни яширин даври (14 кун) якунлангани ва тиббий кўрик давомида ҳеч қандай коронавирус инфекцияси белгилари аниқланмаганлиги боис тиббий кузатув ишлари якунланди. Бугунги кунда 724 нафар фуқаро 14 кунлик тиббий кузатувга олинди», — дейилади хабарда.
Ҳукумат комиссияси қарори билан 4—6 февраль кунлари Ўзбекистонга Пекин шаҳридан 2 та ҳамда Ухань шаҳридан 1 та чартер рейслар орқали жами 584 нафар Ўзбекистон фуқароси олиб келинди. Фуқароларнинг барчаси Жаҳон соғлиқни сақлаш ташкилоти тавсиясига кўра махсус тайёрланган муассасаларга жойлаштирилди ва 14 кун муддат давомида (касалликнинг яширин даври давомида) тиббий назоратга олинди. Фуқаролар учун махсус тайёрланган муассасаларда барча зарурий шароитлар яратилган.
Агентликнинг марказий штаби мутахассислари томонидан 71-276-49-66 ишонч телефони орқали мурожаат қилганларга тушунтиришлар, аниқ маълумотлар ва зарур тавсиялар бериб борилмоқда.
Изоҳ (0)