5 февраль, чоршанба куни, соат тахминан 19:40 атрофида Самарқанд вилояти Пастдарғом тумани Чархин шаҳарчасидан оқиб ўтувчи Дарғом каналига номаълум қиз тушиб кетган. Мазкур воқеани тасодифан кўриб қолган Самарқанд Иқтисодиёт ва сервис институти талабалари Рўзимурод Мардонов ва Сарвар Муҳаммадиев қизни қутқариб қолган. Бу ҳақда «Дарё» мухбири Фарҳод Норбўтаев хабар бермоқда.
«Каттақўрғон туманига кетаётган вақтимизда Дарғом канали кўпригидан ўтаётганда қандайдир шарпани кўрдик. Автомобилни тўхтатиб, пастга қараганимизда номаълум кишининг сувга чўкаётганини кўрдик. Одамнинг сувга оқаётганини кўриб, кийимларимиз билан сувга ташладик. 500 метр узоққа оқиб бориб уни қутқарганимизда 18—20 ёшли қиз эканлигини билдик. Уни зудлик билан Пастдарғом тумани тиббиёт бирлашмасига олиб бориб, ҳолат юзасидан ИИБга мурожаат қилдик», — дейди қутқарувчилардан бири.
Пастдарғом туман ИИБнинг маълум қилишича, сувга тушиб кетган қиз тумандаги «Манғитобод» маҳалласида яшовчи, 2000 йилда туғилган М.Т. бўлиб, ҳозирда унинг аҳволи яхши.
Аввалроқ Қашқадарёда Миллий гвардия ходимлари Қарши шаҳридаги Ислом Каримов кўчасидан оқиб ўтувчи Қашқадарё дарёсига сакраб, ўз жонига қасд қилмоқчи бўлган икки фуқаронинг ҳаётини сақлаб қолган эди. Самарқандлик йигит эса сувда чўкаётган 3 яшар болакайни қутқариб қолганди. Хоразмлик 21 ёшли Ёқуббой Дўсматов сувга чўкаётган аёлнинг ҳаётини қутқариб қолган. Бу жасорати учун Ёқуббой Дўсматов ФВБга ишга таклиф қилинди. Бироқ бу вақтда у Россияга ишлашга жўнаб кетган эди. Россияга боргач, йигитнинг ўзи ҳам қийин вазиятга тушиб қолди.
Изоҳ (0)