2020-yilning 3-fevral kuni O‘zbekistonning Yekaterinburg shahridagi (Rossiya) Bosh konsulxonasi 3 nafar O‘zbekiston fuqarolarining koronavirus gumoni bilan kasalxonaga yotqizilgani to‘g‘risida OAV xabarini tasdiqladi. Novosibirsk-Tyumen aviareysida uchgan Xitoy fuqarosida koronavirus aniqlanganidan so‘ng ushbu reysning barcha yo‘lovchilari kasalxonalarga joylashtirilgan. Bu haqda O‘zbekiston Tashqi ishlar vazirligining Telegram’dagi rasmiy kanali xabar berdi.

Foto: “Ngs.ru”

“Bosh konsulxona yurtdoshlarimiz joylashtirilgan tibbiyot muassasasi bilan aloqa o‘rnatdi. Shifokorlar bergan ma’lumotga ko‘ra, O‘zbekiston fuqarolarining ahvoli qoniqarli va koronavirus simptomlari kuzatilmagan. Ularning analizlari Tyumen va Novosibirsk tibbiyot muassasalariga yuborilgan, u yerda puxta o‘rganilganidan so‘ng tibbiy xulosa beriladi”, – deyiladi xabarda.

Shuningdek, TIV konsullik-huquqiy departamenti Rossiyaning Ural federal okrugi (Kurgan viloyati, Sverdlovsk viloyati, Tyumen viloyati, Chelyabinsk viloyati, Xanti-Mansiysk avtonom okrugi – Yugra, Yamal-Nenetsk avtonom okrugi) hududida bo‘lib turgan O‘zbekiston fuqarolari zarur holatlarda O‘zbekistonning Yekaterinburg shahridagi Bosh konsulxonasiga +7 343 276 31 66, +7 343 272 31 33 telefon raqamlari orqali murojaat qilishi mumkinligini eslatib o‘tgan.

Sog‘liqni saqlash vazirligi O‘zbekistonda koronavirus tarqalgani haqidagi xabarlar haqiqatga to‘g‘ri kelmasligini, bugungi kunga qadar O‘zbekiston fuqarolari orasida infeksiya qayd etilmaganini ma’lum qilgan edi.

Tashqi ishlar vazirligi Xitoydagi o‘zbekistonliklarni evakuatsiya qilish uchun Pekindan Toshkentga charter reyslar 4 va 5-fevral kunlari Pekin aeroportning 2-terminalidan amalga oshirilishini ma’lum qilib, O‘zbekiston fuqarolaridan 3-fevral, dushanba kuni, Pekin shahridaga elchixonaga kelishlarini so‘ragan. Uzbekistan Airways kompaniyasi O‘zbekiston Prezidentining buyrug‘iga binoan, tashkil etilgan hukumat komissiyasining qaroriga asosan, joriy yilning 4—5-fevral kunlari Xitoydagi O‘zbekiston fuqarolarini evakuatsiya qilish uchun uchta charter reysini amalga oshirilishini tasdiqlagan. Sanitar-epidemiologik osoyishtalik agentligi Xitoydan kelgan O‘zbekiston fuqarolari 14 kun muddatga tibbiy nazoratga olinganini xabar qilgan.

Shuningdek, vazirlik aviaqatnovlar bekor qilingani tufayli Pekin aeroportida qolib ketgan 3 nafar o‘zbekistonlik talabaga yordam ko‘rsatilishini ma’lum qilib, talabalar bilan aloqa o‘rnatib, muammoni hal qilish bo‘yicha diplomatlar tegishli choralarni ko‘rayotganini e’lon qildi.

3-fevral tongidagi ma’lumotlarga ko‘ra, Xitoydagi koronavirus qurbonlari soni 361 nafarga yetgan.