Самарқанд вилояти Ургут туманида 2019 йилнинг 3 октябрь куни фуқаро М.Ж. ҳамқишлоғи Б.Б.нинг хонадонидаги тўй маросимида меҳмонларга тарқатилаётган ошни олиш давомида қўшниси А.Қ. билан ўзаро тортишиб қолган. Юзага келган жанжал вақтида А.Қ. уни ножўя сўзлар билан ҳақорат қилган. Бундан ғазабланган М.Ж.нинг унга нисбатан нафрати ошиб, А.Қ.ни қасддан ўлдириш орқали ўч олишни режалаштирган, деб хабар бермоқда «Дарё» мухбири Фарҳод Норбўтаев.
Маълум бўлишича, 2019 йилнинг 6 октябрь куни соат 13:00 атрофида А.Қ.ни кўчада келаётганлигини кўрган М.Ж. ўзининг жиноий режасини амалга ошириш учун қулай фурсат етганлигини ўйлаб, гўёки ундан узр сўраш учун уни алдаб чақириб олган. М.Ж. уйининг дарвозахонасида турган ошхона пичоғини кутилмаганида А.Қ.нинг чап биқин соҳасига қасддан бир маротаба санчган. Сўнг М.Ж. А.Қ.нинг бўйин соҳасидан судраб уйига олиб кирган ва яна икки маротаба унинг чап биқин соҳасига пичоқ урган.
А.Қ. ҳаётига бўлаётган тажовуздан ўзини сақлаш мақсадида атрофдагиларни ёрдамга чақирган. М.Ж.нинг отаси Н.Ж. унинг овозини эшитиб югуриб келган ва ўғлининг жиноий ҳаракатлари олдини олиш учун унга нисбатан жисмоний куч ишлатиш орқали қўлида бўлган пичоқни олиб қўйган.
А.Қ.га ўз вақтида малакали тиббий ёрдам кўрсатилиб, ҳаёти сақлаб қолинган.
Жиноят ишлари бўйича Тайлоқ туман суди раиси Марат Эргашевнинг «Дарё»га маълум қилишича, судланувчи М.Ж. Ўзбекистон Республикаси Жиноят Кодексининг 97-моддаси 1-қисмида назарда тутилган жиноятни содир этганликда айбли деб топилиб, унга нисбатан 6 йил муддатга озодликдан маҳрум қилиш жазоси тайинланган.
Аввалроқ Тошкентда эркак хотинини пичоқламоқчи бўлганида уни тўхтатган ИИБ ходимини жароҳатлагани ҳақида хабар берилган эди. 31 январь куни Самарқандда қайнука келинойисини пичоқлаб ўлдирган. Ғаллаоролда эса эрини пичоқлаган аёлга нисбатан 3 йил озодликни чеклаш жазоси тайинланган эди.
Изоҳ (0)