Президент Шавкат Мирзиёев парламентга йўллаган Мурожаатномасида ҳокимларнинг ваколатларини қайта кўриб чиқиш ва уларга хос бўлмаган ҳамда бир-бирини такрорлайдиган функцияларни тегишли органларга ўтказиш масаласига алоҳида эътибор қаратди.
Мурожаатномада таъкидланганидек, амалдаги қонун ҳужжатларида ҳокимликларнинг 300 га яқин вазифа ва функциялари назарда тутилган. Бундан 175 таси мазмун-моҳиятига кўра ҳокимларнинг асосий вазифалари тоифасига кирмайди ва турли идораларнинг функцияларини такрорлайди.
Сенат ахборот хизматига кўра, шу муносабат билан Олий Мажлис Сенати Суд-ҳуқуқ масалалари ва коррупцияга қарши курашиш қўмитаси ҳузурида вазирлик ва идоралар мутасаддилари ҳамда жамоатчилик вакилларидан иборат ишчи гуруҳ тузилди.
6 февраль, пайшанба куни, Олий Мажлис Сенатида мазкур ишчи гуруҳнинг биринчи йиғилиши бўлиб ўтди. Унда сенаторлар, ишчи гуруҳ аъзолари, вазирлик ва идоралар мутасаддилари ҳамда оммавий ахборот воситалари вакиллари иштирок этди.
Тадбирда ишчи гуруҳ аъзолари ҳокимларнинг ваколатларини қайта кўриб чиқиш ва уларга хос бўлмаган ҳамда бир-бирини такрорлайдиган функцияларни тегишли органларга ўтказишни таъминлаш бўйича ўз фикр-мулоҳазаларини билдирди. Шунингдек, йиғилишда ишчи гуруҳ самарали фаолият кўрсатиши учун чора-тадбирлар ишлаб чиқилди.
Изоҳ (0)